රුසියාවේ උසස් අධ්‍යාපනය ලබා දෙන බව පවසා, සංචාරක වීසා යටතේ එරටට සිසුන් රැගෙන ගොස්, ඔවුන්ගේ මුදල් වංචා කළ පුද්ගලයෙකු කටුනායක ගුවන් තොටුපොළේ දී අත්අඩංගුවට ගෙන තිබෙනවා.
ඒ, මීගමුව විශේෂ අපරාධ විමර්ශන අංශයේ නිලධාරීන් කණ්ඩායමක් විසින්.
එලෙස අත්අඩංගුවට ගෙන ඇත්තේ වත්තල, හුණුපිටිය ප්‍රදේශයේ පදිංචි 32 හැවිරිදි පුද්ගලයෙක්.
සැකකරු කටාන ප්‍රදේශයේ සිසුවෙකු රුසියාවේ උසස් අධ්‍යාපනය සදහා යවන බව පවසා රුපියල් විසි එක් ලක්ෂ අනූ පන් දහසක මුදලක් වංචා කිරීම පිළිබඳ මීගමුව විශේෂ අපරාධ විමර්ශන අංශය වෙත පැමිණිල්ලකි ලැබී තිබෙනවා.
එමෙන්ම සැකකරුට එරෙහිව මාතර මූලස්ථානය පොලිසිය වෙත පැමිණිලි 17ක්, කුරුණෑගල පොලිසියට පැමිණිළි 03ක්, කුලියාපිටිය පොලිසියට පැමිණිළි 02ක් සහ නාරාහේන්පිට පොලිසියට එක් පැමිණිල්ලක් ලැබී ඇති බවයි පොලිසිය පැවසුවේ.
ඊට අමතරව වාද්දුව, අම්පාර සහ මොරටුව පොලිසිවලට පැමිණිළි ලැබී තිබෙනවා.
සැකකරු විසින් රුසියාවට රැගෙන ගිය සිසුවෙකුට පිහියකින් ඇණ තුවාල සිදුකිරීම පිළිබඳ එරට පොලිසිය ඔහුට එරෙහිව විමර්ශන ආරම්භ කිරීමත් සමග එයින් මිදීම සඳහා දිවයිනට පැමිණ ඇති බවයි පොලිසිය පැවසුවේ.
