මග නැගුම ආයතනයේ මුදල් සාපරාදී ලෙස පරිහරණය කිරීම සඳහා ආධාර අනුබල දුන්නේ යැයි අත්අඩංගුවට ගන්නා ලද එහි හිටපු නිලධාරින් දෙදෙනෙකු මෙම මස 27 වනදා දක්වා රක්ෂිත බන්ධනාගාර ගත කරන ලෙස කොළඹ මහේස්ත්‍රාත් අධිකරණය අද නියම කළා.
පොලිස් මූල්‍ය අපරාධ විමර්ශන කොට්ඨාසය මගින් අත්අඩංගුවට ගන්නා ලද මග නැගුම ආයතනයේ හිටපු නියෝජ්‍ය සාමාන්‍යාධිකාරී අබේසිංහ අධිකාරි සහ හිටපු මුදල් අතිරේක සාමාන්‍යාධිකාරී අනගි පුරගේ මයිකල් යන සැකකරුවන් දෙදෙනා මෙසේ රක්ෂිත බන්ධනාගාර ගත කර තිබෙනවා.
2012 සහ 2015 අතර කාලසීමාව තුළ ව්‍යාජ ලෙස ව්‍යාපෘති සඳහා මුදල් අනුමත කරමින් මුදල් සාපරාදී සාවද්‍ය පරිහරණය කිරීම සඳහා ආධාර අනුබලදීමේ සිද්ධියක් සම්බන්ධයෙන් මොවුන් අත්අඩංගුවට ගෙන තිබෙනවා.
මෙම කරුණට අදාළව 2017 වසරේ අධිකරණයට කරුණු වාර්තා කළ බවත් නීතිපති උපදෙස් මත මෙම සැකකරුවන් අත්අඩංගුවට ගෙන ඉදිරිපත් කරන බවත් පොලිසිය අධිකරණයට දැනුම් දුන්නා.
සැකකරුවන් ඇප මත මුදා හරින ලෙස ඔවුන්ගේ නීතිඥවරු ඉල්ලා සිටියද සැකකරුවන් මෙම මස 27 වනදා දක්වා රක්ෂිත බන්ධනාගාර ගත කරන ලෙස නියෝග කළා.
