පළාත් පාලන ඡන්ද විමසීම සඳහා කැස්බෑව නගර සභාව වෙනුවෙන් සභාව වෙනුවෙන් ජාතික ජන බලවේගය විසින් ඉදිරිපත් කර තිබෙන නාමයෝජනා පත්‍රයට ඇතුලත්ව සිටින අපේක්ෂිකාවකගේ නීත්‍යානුකූල භාවය අභියෝගයට ලක් කරමින් ශ්‍රේෂ්ඨාධිකරණයට රිට් පෙත්සමක් ඉදිරිපත් කර තිබෙනවා.
මෙවර පළාත් පාලන ඡන්ද විමසීම සඳහා සමගි ජන බලවේගය පක්ෂයෙන් නාම යෝජනා භාරදී සිටින අපේක්ෂකයෙකු වන
එම්.ටී. රත්නසිරි ප්‍රනාන්දු මහතා විසින් පෙත්සම ඉදිරිපත් කළා.
නීතිඥ දිමුතු කුරුප්පු ආරච්චි මහත්මියගේ මාර්ගයෙන් ගොනුකර තිබෙන මෙම පෙත්සම තුළින් පෙත්සම්කරු කියා සිටින්නේ ජාතික ජන බලවේගය විසින් කැස්බෑව නගර සභාව සඳහා බාර දී තිබෙන නාමයෝජනා පත්‍රයේ සිටින කාන්තා අපේක්ෂිකාවක වන එස්. කේ. එල්. විනීකා ද අල්විස් නමැත්තිය කැස්බෑව නගර සභාවේ සේවය කරමින් සිටින සේවිකාවක් බවයි.
නාමයෝජනා භාරදෙන අවස්ථාව වන විටත් ඇය එම සේවයෙන් ඉවත් වී නොතිබූ බව පෙන්වා දෙන පෙත්සම්කරු එම අවස්ථාව වන විටත් ඇය කැස්බෑව නගර සභාවේ සේවයේ නිරත වී සිටින අයෙකු බවත් සඳහන් කළා.
මෙය පළාත් පාලන ඡන්ද විමසීම පනතේ විධි විධනයන්ට සම්පූර්ණයෙන්ම පටහැනි ක්‍රියාවක් බවත් එම තැනැත්තිය පළාත් පාලන ඡන්ද විමසීම සඳහා තරඟ කිරීමට තේරී පත්වීමට සහ ඡන්දය ප්‍රකාශ කිරීමට නුසුදුසු තැනැත්තියක් බවත් පෙත්සම්කරු පෙන්වා දී තිබෙනවා.
මීට අදාලව තමන් නාමය යෝජනා භාර ගන්නා අවස්ථාවේ විරෝධතා ඉදිරිපත් කළත් තේරීම් භාර නිලධාරියා ඒ සම්බන්ධයෙන් තීරණයක් නොදුන් බවත් පෙත්සමේ චෝදනා කර තිබෙනවා.
ඒ අනුව අදාල තැනැත්තිය පළාත් පාලන ඡන්ද විමසීම සඳහා අපේක්ෂිකාවක් වශයෙන් ඉදිරිපත් වීමට නුසුදුසු බවට තීන්දුවක් ලබා දී ඇයගේ නාමයෝජනාව බල රහිත කිරීමේ රිට් ආඥාවක් නිකුත් කරන ලෙසත් පෙත්සමෙන් වැඩිදුරටත් ඉල්ලා තිබෙනවා.
මෙම පෙත්සමේ වග උත්තරකරුවන් ලෙස මැතිවරණ කොමිසමේ සභාපතිවරයා ඇතුළු සාමාජිකයින්, අදාල තේරීම් භාර නිලධාරියා ඇතුළු 44 දෙනකු නම්කර තිබෙනවා.
මෙම පෙත්සම අද එස්. තුරෙයි රාජා, මහින්ද සමය වර්ධන සහ සම්පත් අබේකෝන් යන මහත්වරුන්ගෙන් සමන්විත යේ ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ කැඳවනු ලැබුවා.
පෙත්සංකාර පාර්ශවය වෙනුවෙන් ජනාධිපති නීතිඥ එරාජ් ද සිල්වා මහතා ඉදිරිපත් කළ කරුණු සලකා බැලූ විනිසුරු මඩුල්ල අදාල පෙත්සම සලකා බැලීම සඳහා ලබන 28 වනදා කැඳවන ලෙස නියම කළා.
