වත්තල පිහිටි ජාත්‍යන්තර පාසලකට පිවිසිය හැකි අතුරු මාර්ග රැසක් පොලිසිය විසින් අවිධිමත්ව වසා දමා ඇතැයි එම පාසලේ සිසු සිසුවියන්ගේ මව්පියන් පවසනවා.
මේ නිසා අවට ප‍්‍රදේශයේ වාහන තදබදය ද වැඩි වී තිබෙන බවයි ඔවුන් පෙන්වා දුන්නේ.
ප්‍රධාන මාර්ගයේ සිට අදාළ ජාත්‍යන්තර පාසලට පිවිසීම සඳහා පටුමගවල් එකොළහක් පමණ ඇති බවත් මෑතකදී සිට ඒ සියලු පටුමගවල් වසා දමා ඇති බවත් සඳහන් කළා.
පොලිසිය විසින් අදාළ මාර්ග මෙලෙස වසා දමා ඇත්තේ පෞද්ගලික පලිගැනීමක් ලෙස බවට ද මව්පියන් තුළ සැකයක් පවතිනවා.
වත්තල පොලිසියේ රථවාහන අංශයේ ස්ථානාධිපතිවරයාගේ පුතා පාසලට මත්පැන් බෝතලයක් රැගෙනවිත් හසු වී ඇති බවත් එහිදී සිසුන් හය දෙනෙකු වෙත පාසලෙන් දඬුවම් කර තිබූ බවත් සඳහන් කළා. ඊට ප්‍රතිචාර දැක්වීමක් ලෙස මෙලෙස මාර්ග අවහිර කරන බවට ප්‍රදේශවාසීන් තුළ මතයක් ඇති බවත් පැවසුවා.
