ඉන්දිය කණ්ඩායමේ ශ්‍රී ලංකා තරග සංචාරයේ එක්දින සහ විස්සයි විස්ස තරගාවලිය පැවැත්වෙන දින වකවානු ප්‍රකාශයට පත් කර තිබෙනවා. ඉන්දීය කණ්ඩායම ලබන ජූලි මස දිවයිනට පැමිණී නියමිත අතර එහිදී දෙරට අතර එක්දින තරග 3ක් සහ පන්දුවාර විස්ස තරග 3ක් පැවැත්විමට නියමිතයි. දෙරට අතර එක්දින තරග 3 පිළිවෙළින් ජූලි මස 13, 16 සහ 19 යන දිනවලදී පැවැත්වීමට නියමිතව තිබෙනවා.
විස්සයි විස්ස තරග 3 පිළිවෙළින් ජූලි මස 22, 24 සහ 27 වනදා පැවැත්වීමටයි සැලසුම් කර ඇත්තේ. තරග පැවැත්වෙන ක්‍රිඩාංගණ මෙතෙක් ප්‍රකාශයට පත්කර නැහැ. මෙම තරගාවලිය සදහා ඉන්දිය ටෙස්ට් කණ්ඩායම නියෝජනය කරන ක්‍රීඩකයින් එක් නොවන බවයි ඉන්දිය ක්‍රිකට් පාලක මණ්ඩලය පැවසුවේ. ඒ අනුව ශ්‍රී ලංකා තරග සංචාරය සදහා නවක ක්‍රීඩකයින්ගෙන් සමන්විත ඉන්දීය යොවුන් කණ්ඩායමක් එක්වනු ඇති.
මේ අතර ශ්‍රි ලංකා කණ්ඩායමේ ආරම්භක පිතිකරුවෙකු මෙන්ම පුහුණුකරුවෙකු ද වූ අවිශ්ක ගුණවර්ධනට එරෙහිව අන්තර් ක්‍රිකට් කවුන්සිලය විසින් එමිරේට්ස් ක්‍රිකට් ආයතනයේ දූෂණ මර්දන පනත යටතේ ගොණු කර තිබූ චෝදනාවලින් ඔහු නිදහස් කර තිබෙනවා. ඒ, ස්වාධීන දූෂණ විරෝධී විනිශ්චය සභාවක් හමුවේ කළ දීර්ඝ විභාගයකින් අනතුරුවයි. අවිශ්ක ගුණවර්ධනට එරෙහිව චෝදනා දෙකක් එල්ල වූ අතර ඔහු එම චෝදනාවලින් ඒකමතිකව නිදහස් කිරීමටයි එම විනිශ්චය සභාව තීරණය කර ඇත්තේ. ඒ අනුව වසර 3කට අධික කාලයක් තාවකාලික ක්‍රිකට් තහනමකට ලක්ව සිටි අවිශ්ක ගුණවර්ධණට යළි ක්‍රිකට් ක්‍රීඩාව හා එක්වීමට හැකියාව ලැබී තිබෙනවා.
අදාළ පනත යටතේ ශ්‍රී ලංකා හිටපු වේග පන්දු යවන ක්‍රීඩක නුවන් සොයිසාට එරෙහිව ද චෝදනා 4ක් ගොණු කර තිබුණා. ස්වාධීන දූෂණ විරෝධී විනිශ්චය සභාව විසින් ඉන් එක් චෝදනාවක් තහවුරු කර ඇති අතර, සෙසු චෝදනා 3 නිශ්ප්‍රභ කර තිබෙනවා. අන්තර් ජාතික ක්‍රිකට් කවුන්සිලය සදහන් කළේ සවිස්තරාත්මක තීරණය ඉදිරියේ දී අදාළ පාර්ශව වෙත දැනුම් දෙන බවයි. හිටපු ක්‍රිකට් ක්‍රීඩක නුවන් සොයිසාට වසර 6ක ක්‍රිකට් තහනමක් පැනවීමට අන්තර් ජාතික ක්‍රිකට් කවුන්සිලය මීට පෙර පියවර ගත්තා. ඒ අන්තර්ජාතික ක්‍රිකට් කවුන්සිලයේ දූෂන මර්දන පනතෙහි වගන්ති 3ක් උල්ලංඝනය කිරීම හේතුවෙන්.
