රුසියාවේ සිට යුරෝපය දක්වා ගෑස් රැගෙන යනු ලබන Nord Stream නම් නළ මාර්ගය බෝල්ටික් මුහුදේදී හානියට ලක්වී ඇති අතර මේ හේතුවෙන් නළයෙන් ගෑස් කාන්දුවෙමින් පවතින බවයි විදෙස් මාධ්‍ය වාර්තා කර සිටින්නේ.
පිපිරිම සිදුව ඇති බෝල්ටික් මුහුදු කලාපය ඉහලින් ගමන් කරනු ලැබූ ඩෙන්මාර්ක් ගුවන් හමුදා යානාවක් විසින් එම ප්‍රදේශය ආසන්නයේ මුහුදේ විශාල වායු බුබුළු මතුවන අයුරු වීඩියෝ ගත කර ඇත.
Nord Stream ගෑස් නළ මාර්ගයේ ඇතිවූ මෙම කාන්දුව කකඩාකප්පල්කාරී ක්‍රියාවක් ද යන්න සම්බන්ධයෙන් මේ වන විට සැක මතුව ඇති බවයි විදෙස් මාධ්‍ය වාර්තා කර සිටින්නේ.
ගෑස් නළයෙන් සිදුව ඇති බව කියන ගෑස් කාන්දුවීම නිසා ඇතිව තිබෙන එක් වායු බුබුලේ පැතිරීම කිලෝමීටරයක් විෂ්කම්භයකින් යුක්ත බවත් කුඩාම කාන්දුව දැක්වෙන වායු බුබුලේ පැතිරීම මිටර් 200ක් පමණ විශාලත්වයකින් යුක්ත බවයි ඩෙන්මාර්ක් හමුදා ප්‍රකාශකයෙකු සඳහන් කර සිටියේ.
මේ අතර ඩෙන්මාර්කයේ බලශක්ති ඒජන්සියේ ප්‍රධානියා පැවසුවේ ගෑස් නළයේ කාන්දුවීම නතර කිරීමට සතියක කාලයක් පමණ ගතවනු ඇති බවයි.
'මුහුදු මතුපිට මීතේන් වලින් පිරී ඇති අතර, එයින් අදහස් කරන්නේ ප්‍රදේශයේ පිපිරීම් වැඩි වීමේ අවදානමක් පවතින බවයි,' ඩෙන්මාර්කයේ බලශක්ති ඒජන්සියේ ප්‍රධානි ක්‍රිස්ටෝෆර් බොට්සාව් සඳහන් කර සිටියේ.
මේ අතර ස්වීඩනයේ ජාතික භූ කම්පන විද්‍යා මධ්‍යස්ථානය සඳහන් කළේ ඔහුගේ උපකරණ වල මුහුද යට සිදුවූ ප්‍රබල පිපිරුමක දත්ත සටහන්ව තිබෙන බවයි.
ස්වීඩ්න් භූ කම්පන විද්‍යාඥ Bjorn Lund එරට මාධ්‍ය ආයතනයක් සමග සම්මුඛ සාකච්ජාවකට එක්වෙමින් ප්‍රකාශ කර සිටියේ Nord Stream නළ මාර්ගයේ නිසැක වශයෙන්ම පිපිරුමක් සිදුව ඇති බවත් එය කඩාකප්පල්කාරී ක්‍රියාවක් විය හැකිබවට අනුමාන කළ හැකි බවයි.
Nord Stream නල මාර්ගය මේ වන විට ක්‍රියාත්මක නොවුවද එහි ස්වභාවික වායු අඩංගු වන බවයි ඩෙන්මාර්ක් බලශක්ති අමාත්‍යවරයා සඳහන් කර සිටියේ.
