ඉතාලිය යළිත් සෙලවෙයි – ගොඩනැගිලි කඩා වැටෙයි

මධ්‍යම ඉතාලියට බලපෑ ප්‍රබල භූ කම්පන දෙකකින් ගොඩනැගිලි රැසක් කඩා වැටී ඇති බව විදෙස් වාර්තා සඳහන් කරනවා.

මේ හේතුවෙන් ජනතාව බියෙන් වීදිවලට පැමිණ ඇති බවත් විදෙස් වාර්තා පැවසුවා.

ඇමෙරිකානු භූ විද්‍යා සමීක්ෂණ ආයතනය පෙන්වාදෙන පරිදි රික්ටර් පරිමාණ 5.5ක ප්‍රථම භූ කම්පනය මසිරාටා ප්‍රාන්තයේ විස්සෝ නගරය ආසන්නයේ සිදුව තිබෙනවා.

ඉන් පැය දෙකකට පසුව රික්ටර් පරිමාණ 6.1ක භුකම්පනයක් එම ප්‍රදේශයේම ඇති වී තිබෙනවා.

කෙසේ වෙතත් භූ කම්පනයෙන් සිදුවූ ජීවිත හානි පිළිබඳ විදෙස් වාර්තා සඳහන් කර නැහැ.

මීට මාස දෙකකට පමණ පෙර දකුණු දිග ඉතාලියේ සිදුවූ භූ කම්පනයකින් පුද්ගලයන් 298 දෙනෙකු ජීවිතක්ෂයට පත්වුණා.