තුර්කියේ ඇති වී තිබෙන අර්බුදකාරී තත්ත්වය සම්බන්ධයෙන් ශී‍්‍ර ලංකාවේ තුර්කි තානාපති කාර්යාලය නිවේදනයක් නිකුත් කර තිබෙනවා.
එහි දැක්වෙන්නේ ප‍්‍රජාතන්ත‍්‍රවාදීව තෝරාපත් වූ ආණ්ඩුව පෙරළා දැමීම සඳහා කුමන්ත‍්‍රණකාරී පිරිසක් උත්සාහ දරන බවයි.
ඇති වූ තත්ත්වයට තුර්කි හමුදාව තුළ සිටින සුළු පිරිසක් පමණක් සම්බන්ධ වී ඇති බවයි එම නිවේදනයේ දැක්වෙන්නේ.
කෙසේවෙතත් මේ වනවිට තත්ත්වය සම්පූර්ණයෙන් පාලනය කර ඇති බවත් තුර්කි ජනාධිපතිවරයා රටේ ජනතාවගේ ආරක්‍ෂාව වෙනුවෙන් පෙනී සිටින බවත් අදාළ නිවේදනයේ වැඩිදුරටත් දැක්වෙනවා.
මේ අතර තුර්කියේ ඇති වි තිබෙන ගැටළුකාරී තත්ත්වයෙන් එහි සිටින ශී‍්‍ර ලාංකිකයන් කිසිවෙකුටත් හිරිහැරයක් සිදුව ඇති බව මෙතෙක් වාර්තා නැතැයි විදේශ කටයුතු අමාත්‍යාංශය පවසනවා.
එහි ප‍්‍රකාශකයෙකු පැවසුවේ තුර්කියේ අන්කාරා නගරයේ පිහිටි ශී‍්‍ර ලංකා තානාපති කාර්යාලය සියලූ තත්ත්වයන් සම්බන්ධයෙන් අවධානයෙන් සිටින බවයි.
තුර්කියේ සිටින ශී‍්‍ර ලාංකිකයන් සම්බන්ධයෙන් තොරතුරු දැන ගැනීමට අවශ්‍ය නම් 00 90 53 40 102 105 යන දුරකථන අංකය ඇමතීමෙන් විස්තර ලබාගත හැකියි.
