ඉකුත් ජනාධිපතිවරණ සමයේදී සිල් රෙදි බෙදාදීමේ වැඩසටහනක් මගින් රජයේ මුදල් අවභාවිත කළ බවට චෝදනා ලබා සිටින හිටපු ජනාධිපති ලේකම් ලලිත් වීරතුංගට ලබන අගෝස්තු මස 30 වෙනිදා සිට සැප්තැම්බර් මස 15 වෙනිදා දක්වා ඉන්දියාවේ වන්දනා චාරිකාවක් සඳහා යාමට කොළඹ මහාධිකරණය අද (03) අවසර ලබාදුන්නා.
ඒ අනුව ඔහුගේ ගුවන් ගමන් බලපත‍්‍රය රුපියල් මිලියන 10 ක බැඳුම්කරයක් මත මුදාහරින බවයි මහාධිකරණය කියා සිටියේ.
මෙම නඩුවේ වැඩිදුර සාක්ෂි විභාගය අද තුන්වන දිනටත් සිදුකෙරුණා. අදාළ සිල් රෙදිවල සැපයුම්කරුවා බව පැවසෙන අන්වර් ෆෙරෝස් නමැත්තෙකු එහිදී සාක්ෂි ලබාදුන් බවයි නෙත් නිවුස් අධිකරණ වාර්තාකරු පැවසුවේ.
