ඉකුත් නොවැම්බර් මාසයේ දී ජාතික පාරිභෝගික මිල දර්ශකය මත පදනම් වූ වාර්ෂික සාමාන්‍ය මතුපිට උද්ධමනය සියයට 6 යි දශම 2 දක්වා ඉහළ ගොස් තිබෙනවා. වාර්ෂික ලක්ෂ්‍යමය මතුපිට උද්ධමනය සියයට 11 යි දශම 1 ක් දක්වා ද ඉහළ ගොස් ඇති බවයි ජන හා සංඛ්‍යා ලේඛන දෙපාර්තමේන්තුව පවසන්නේ.
ජාතික පාරිභෝගික මිල දර්ශකයෙහි වාර්ෂික ලක්ෂ්‍යමය වෙනස මගින් මනිනු ලබන මතුපිට උද්ධමනය, ඔක්තෝබර් මාසයේ පැවති සියයට 8 යි දශම 3 සිට නොවැම්බර් මාසයේ දී සියයට 11 යි දශම 1 දක්වා ඉහළ ගොස් තිබුණා.
උද්ධමනය සඳහා ආහාර සහ ආහාර නොවන කාණ්ඩ දෙකෙහිම අයිතමවල මිල ගණන්හි සිදු වූ මාසික ඉහළ යෑම් හේතු වී ඇති බවයි ජන හා සංඛ්‍යාලේඛන දෙපාර්තමේන්තුව පවසන්නේ.
ඒ අනුව, ආහාර කාණ්ඩයෙහි වාර්ෂික ලක්ෂ්‍යමය උද්ධමනය ඔක්තෝබර් මාසයේ දී පැවති සියයට 11 යි දශම 7හි සිට නොවැම්බර් මාසයේ දී සියයට 16 යි දශම 9 දක්වා ඉහළ ගිය අතර, ආහාර නොවන කාණ්ඩයෙහි වාර්ෂික ලක්ෂ්‍යමය උද්ධමනය ඔක්තෝබර් මාසයේ පැවති සියයට 5 යි දශම 4හි සිට නොවැම්බර් මාසයේ දී සියයට 6 යි දශම 2 දක්වා ඉහළ ගොස් තිබෙනවා.
නොවැම්බර් මාසයේ දී ජාතික පාරිභෝගික මිල දර්ශකයෙහි මාසික වෙනස සියයට 3 යි දශම 1 යි 4 ක් ලෙස වාර්තා වූ අතර, ආහාර සහ ආහාර නොවන කාණ්ඩ දෙකෙහිම අයිතමවල මිල ගණන් පිළිවෙළින්, සියයට 2 යි දශම 6 යි 1 කින් සහ සියයට 0 යි දශම 5 යි 3කින් ඉහළ යෑම මේ සදහා හේතු වි තිබෙනවා.
වාර්ෂික ලක්ෂ්‍යමය පදනම මත මූලික උද්ධමනය, 2021 ඔක්තෝබර් මාසයේ පැවති සියයට 7 යි දශම 2 හි සිට නොවැම්බර් මාසයේ දී සියයට 8 යි දශම 8 දක්වා ඉහළ ගියා. වාර්ෂික සාමාන්‍ය මූලික උද්ධමනය, ඔක්තෝබර් මාසයේ පැවති සියයට 4 යි දශම 6 හි සිට නොවැම්බර් මාසයේ දී සියයට 5 දශම 0 දක්වා ඉහළ ගිය බවයි ජන හා සංඛ්‍යාලේඛන දෙපාර්තමේන්තුව වැඩිදුරටත් පවසන්නේ.
ඉන්ධන මිල වැඩිවීම හේතුවෙන් මෙරට උද්ධමනය සියයට 03 කින් වැඩිවනු ඇති බවටයි ශ්‍රී ලංකා මහ බැංකුව පුරෝකථනය කර ඇත්තේ.
