පුටින් හිතවාදී විචාරකයින් රුසියාවේ මිලිටරි උපක්‍රම සම්බන්ධයෙන් මේ වන විට චෝදනා එල්ලකරමින් සිටින බව විදෙස් මාධ්‍ය වාර්තා පවසනවා. ඒ, රුසියානු හමුදා විසින් අත්පත් කරගෙන සිටි යුක්‍රේනයේ නගර කිහිපයක බලය නැවත යුක්රේන හමුදා අතට පත්වීමත් සමඟයි.
රුසියානු හමුදාව අල්ලාගෙන සිටි මූලෝපායික නගරයක් වන ලයිමන් නගරය යළි අත්පත් කර ගැනීමට යුක්රේන හමුදා පසුගියදා සමත් වුණා. එය රුසියානු හමුදාවේ සැලකිය යුතු පසුබෑමක් බවයි යුධ විශ්ලේෂකයින් පෙන්වා දෙන්නේ.
ඇතැම් විදෙස් මාධ්‍ය පැවසුවේ යුක්රේන හමුදා සාමාජිකයින් දහස් ගණනක් ලයිමන් නගරය වටකර තිබූ පසුබිමක් තුළ රුසියානු හමුදාව එලෙස පළා ගොස් ඇති බවයි.
නගරය සම්පූර්ණයෙන් රුසියානු හමුදාවෙන් ගලවා ගත් බව යුක්රේන ජනාධිපති ව්ලොඩිමීර් ස්ලෙනෙස්කි විසින් ප්‍රකාශයට පත් කළා. ලයිමන් නගරය රුසියාව යටතේ පවතින ඩොනෙට්ස්ක් කලාපය තුළ පිහිටා තිබීම ද විශේෂත්වයක්.
