Friday, April 4, 2025

General line - 0115112241

ළමුන්ගේ වීඩියෝ සමාජ මාධ්‍යයට මුදාහරින පුද්ගලයින්ට නීතිමය පියවර



දඹුල්ල නගරයේ ජංගම දුරකථන අලෙවිසැලකින් දුරකථනයක් හා උපාංග සොරකම් කිරීමට අදාළ වීඩියෝ පටය සමාජ මාධ්‍යයට මුදාහැරි පුද්ගලයාට එරෙහිව නීතිය ක්‍රියාත්මක කළ යුතු බව ආචාර්ය නීතීඥ ප්‍රතිභා මහානාම පවසනවා.

ඊට පාදක වූයේ දඹුල්ල ප්‍රදේශයේ ජංගම දුරකථන අලෙවිසැලකදී දුරකථන සහ උපාංග සොරකම් කළ කාන්තාවන් දෙදෙනෙකු පසුගියදා අත්අඩංගුවට ගැනීමේ සිද්ධියයි. 

ඔවුන්ගේ වීඩියෝවක් කිසියම් පුද්ගලයෙකු විසින් සමාජ මාධ්‍ය වෙත මුදාහැර තිබුණා.

සොරකම් කරන කාන්තාවන් දෙදෙනා සමඟ කුඩා ළමයෙකු ද සිටි අතර ඔහුගේ රුවද වීඩියෝවේ පටිගතවී තිබුණා.

එලෙස ළමයෙකුගේ රුව සහිත එම වීඩියෝ පටය සමාජ මාධ්‍යයට මුදාහැරි පුද්ගලයාට එරෙහිව පාර්ශව රැසක් විරෝධය මතුවුණේ ඉන් අනතුරුවයි. 

දැනුවත්ව හෝ නොදැනුවත්ව සොරකම් කරන ළමයෙකුගේ වීඩියෝ පට සමාජ මාධ්‍යයට මුදා හැරීම කිසිසේත් අනුමත කළ නොහැකි බවද ආචාර්ය නීතීඥ ප්‍රතිභා මහානාම වැඩිදුරටත් පැවසුවා.


එවැනි පුද්ගලයන්ට එරෙහිව නීතිය ක්‍රියාත්මක කිරීමට අවස්ථා පවතින බවයි නෙත් නිවුස් කළ විමසීමකදී ඔහු කියා සිටියේ.


කෙසේවෙතත් මේ සම්බන්ධයෙන් ජාතික ළමාරක්ෂක අධිකාරියෙන් කළ විමසීමකදි පැවසුවේ එවැනි ක්‍රියා නතර කිරීම සඳහා පවතින නීති ප්‍රමාණවත් නොවන බවයි.

ඒ අනුව ඊට අදාළ නීති කඩිනමින් සකස්විය යුතු බවද එම අධිකාරිය වැඩිදුරටත් සඳහන් කළා.