නීති විරෝධී ලෙස වියලි කහ කිලෝ ග්‍රෑම් 1373කට අධික තොගයක් රැගත් ඩිංගි යාත්‍රාවක් සමඟ සැකකරුවන් දෙදෙනෙක් පුත්තලමේදී නාවික හමුදා භාරයට ගෙන තිබෙනවා.
ඒ, මුහුදු මාර්ග ඔස්සේ සිදු කෙරෙන ජාවාරම් ඇතුළු නීති විරෝධී ක්‍රියා මැඩපැවැත්වීම සඳහා නාවික හමුදාව විසින් පුත්තලම පල්ලියවාසල්පාඩු වෙරළ ප්‍රදේශයේ සිදුකළ විශේෂ සෝදිසි මෙහෙයුමකදීයි.
එම නීති විරෝධී වියළි කහ තොගය උර 44ක අසුරා ඩිංගි යාත්‍රාව මගින් මුහුදු මාර්ගය ඔස්සේ මෙරටට රැගෙන පැමිණ ඇති බවයි වාර්තා වන්නේ.
නාවික හමුදා භාරයට ගත් සැකකරුවන් දෙදෙනා කල්පිටිය ප්‍රදේශයෙහි පදිංචිකරුවන් බවයි නාවික හමුදාව පැවසුවේ.
සිද්ධියට අදාළ විමර්ශන සිදු කිරීමට පුත්තලම පොලිස් ස්ථානය වෙත භාර දුන් බවද නාවික හමුදාව වැඩිදුරටත් පැවසුවා.
