දුම්රිය ස්ථානාධිපතිවරුන් හා දුම්රිය පාලකවරුන් ආරම්භ කළ වැඩ වර්ජනය මේ වන විටත් ක්‍රියාත්මකයි. පෙරේදා පස්වරුවේ සිට ආරම්භ කළ මෙම වෘත්තීය සමිති ක්‍රියාමාර්ගය ඊයේ මධ්‍යම රාත්‍රී 12න් අවසන් කිරීමටයි මීට පෙර තීරණය කර තිබුණේ.
එහෙත් බලධාරීන් තම ගැටලුවලට විසඳුම් දෙනවා වෙනුවට මර්දනය ක්‍රියාත්මක කිරීමේ උත්සහය හේතුවෙන් වර්ජනය අඛණ්ඩව ක්‍රියාත්මක කරන බවයි දුම්රිය ස්ථානාධිපතිවරන්ගේ සංගමයේ සභාපති සුමේධ සෝමරත්න නෙත් නිවුස් වෙත පැවසුවේ.
සාමාන්‍යයෙන් සතියේ දිනකට ක්‍රියාත්මක දුම්රිය ගමන් වාර ගණන 320 ක් පමණ වනවා. ඊයේ පෙරවරුවේ දුම්රිය ගමන් වාර 35ක් ක්‍රියාත්මක වූ අතර පස්වරුවේ ක්‍රියාත්මක වුණේ දුම්රිය ගමන් වාර 30ක් පමණයි.
ඒ අනුව දෛනිකව ධාවනය විය යුතු දුම්රිය ගමන්වාරවලින් සියයට 80ක් පමණ ඊයේ ධාවනය වූයේ නැහැ.
මේ හේතුවෙන් දුම්රියෙන් නිවෙස් බලා යාමට පැමිණි බොහෝ පිරිසකට ඊයේ පස්වරුවේද සිදු වුණේ දැඩි අසීරුතාවකට මුහුණදීමටයි.
ප්‍රමාණවත් පරිදි දුම්රිය ධාවනය නොවීම සහ ධාවනය වූ සීමිත දුම්රියන්ගෙන් ප්‍රමාණය ඉක්මවා ගමනාගමන අවශ්‍යතා සපුරා ගැනීමට මගීන් පැමිණීමත් සමග ඊයේ රාත්‍රියේ කොටුව දුම්රිය ස්ථානයේ උණුසුම් තත්ත්වයක්ද ඇති වුණා.
දුම්රිය දෙපාර්තමේන්තුවේ සිටින සමස්ත දුම්රිය ස්ථානාධිපතිවරුන්ගේ සංඛ්‍යාව 922ක්.
නියමිත පරිදි උසස් වීම් ලබානොදීම ඇතුළු කරුණු 14ක් මුල් කරගනිමින් දුම්රිය ස්ථානාධිපති සංගමය මෙම වැඩවර්ජනය ආරම්භ කළේ පෙරේදා පස්වරුවේයි.
සියලුම දුම්රිය ස්ථානාධිපතිවරුන් මෙම වර්ජනයට එක්ව සිටින බවයි දුම්රිය ස්ථානාධිපතිවරන්ගේ සංගමයේ සභාපති සුමේධ සෝමරත්න පැවසුවේ.
දුම්රිය සාමාන්‍යාධිකාරිවරයාගේ නියෝගය පරිදි සියලුම ස්ථානාධිපතිවරුන් මේ වන විට සේවය හැර ගොස් සිටින බව ඔහු සඳහන් කළා.
මේ අතර, දුම්රිය වර්ජනය ක්‍රියාත්මක වන අවස්ථාවේදී ධාවනය වූ දුම්රියකින් ඇද වැටී ඊයේ පස්වරුවේ බෙම්මුල්ල දුම්රිය ස්ථානය අසලදී පුද්ගලයෙකු ජිවිතක්ෂයට පත් වුණා.
කොළඹ කොටුවේ සිට පොල්ගහවෙල දක්වා ධාවනය වූ දුම්රියකින් ඇද වැටී ඔහු ජීවිතක්ෂයට පත් වූ අතර වර්ජනය ක්‍රියාත්මක වීම හේතුවෙන් එම දුම්රියේ මගීන් අධික ලෙස ගමන් ගෙන ඇති බවටයි වාර්තා වුණේ.
