ශ්‍රී ලාංකික කාර්ය මණ්ඩල සාමාජිකයින් තිදෙනෙකුද සමග ඕමානය ආසන්න මුහුදේදී අනතුරට ලක්වූ ඉන්ධන ප්‍රවාහන නෞකාව ආශ්‍රිතව විශේෂ මෙහෙයුමක් දියත් කර තිබෙනවා.
ඒ, එහි සිටින කාර්ය මණ්ඩල සාමාජිකයින් බේරා ගැනීම සඳහායි.
කෙසේවෙතත් අතුරුදන් වූ කාර්ය මණ්ඩල සාමාජිකයින් සම්බන්ධයෙන් මෙතෙක් කිසිදු තොරතුරක් වාර්තා වී නැහැ.
නෙත් නිවුස් මේ සම්බන්ධයෙන් ශ්‍රී ලංකා නාවික හමුදාවෙන්ද විමසීමක් කළා.
එහි ජ්‍යේෂ්ඨ ප්‍රකාශකයෙකු පැවසුවේ ඕමානය ඇතුළු බලධාරීන් නෞකාව සෙවීමේ කටයුතුවල නිරත වී සිටින බවයි.
මේ දක්වා ඊට අදාළ කිසිදු තොරතුරක් ලැබී නොමැති බවද ඔහු පැවසුවා.
ශ්‍රී ලාංකිකයින් සම්බන්ධයෙන් මෙතෙක් කිසිදු තොරතුරක් නොමැති බවයි නාවික හමුදාවේ ජ්‍යේෂ්ඨ ප්‍රකාශකයා පැවසුවේ.
කෙසේවෙතත් අනතුරෙන් පසු නෞකාව මුහුදේ ගිලී ඇති බවට තොරතුරු පවතින බව ඔහු සඳහන් කළා.
අනතුර සිදු වන අවස්ථාවේ එහි සිට ඇති කාර්ය මණ්ඩල සාමාජිකයින් සංඛ්‍යාව 16ක්. ඉන් තිදෙනෙක් ශ්‍රී ලාංකිකයින්.
සෙසු 13 දෙනාම ඉන්දීය ජාතිකයින් වනවා.
ඕමාන සමුද්‍රීය මධ්‍යස්ථානය පැවසුවේ මෙලෙස අනතුරට ලක්ව ඇත්තේ කොමරෝස් ධජය සහිත ඉන්ධන ප්‍රවාහන නෞකාවක් බවයි.
නෞකාව යේමනයේ ඒඩ්න් වරාය වෙත ගමන් කරමින් තිබූ බවටයි වාර්තා වන්නේ.
