ජාඇල, වැලිගම්පිටිය, ශාන්ත ආනා පාරේ පිහිටි නිවසකට අද අළුයම වෙඩි ප්‍රහාරයක් එල්ල වී තිබෙනවා.
හෙරොයින් ජාවාරම සම්බන්ධව බන්ධනාගාර ගතව ඇප මත මුදාහැර සිටින රාගම බටුවත්තේ චාමර නැමැත්තාගේ නිවසට එලෙස වෙඩිතබා ඇති බවයි නෙත් නිවුස් වාර්තාකරු පැවසුවේ.
වෙඩි ප්‍රහාරය එල්ලවන අවස්ථාවේ චාමර නැමැත්තාගේ බිරිඳ සහ දරුවා නිවසේ රැඳී සිට නැහැ.
එම වෙඩි තැබීමේදී අසල නිවාස දෙකකට ද වෙඩි වැදී අලාභ හානි සිදුව තිබෙනවා.
යතුරු පැදියකින් පැමිණි පුද්ගලයන් දෙදෙනෙකු විසින් මෙම වෙඩි තැබීම සිදුකර ඇති බවයි වාර්තා වන්නේ.
ටී 56 වර්ගයේ ගිනි අවියකින් වෙඩි ප්‍රහාර 30 ක් පමණ එල්ල කර ඇතැයි පොලිසිය පවසනවා.
කෙසේවෙතත් එම වෙඩි ප්‍රහාරවලින් කිසිවෙකුටටත් හානි සිදුව නැහැ. පසුගිය 15 වනදා රාත්‍රියේ ද මෙම නිවසට යතුරු පැදියකින් පැමිණි පුද්ගලයන් දෙදෙනෙකු විසින් වෙඩි තබා පලාගොස් තිබෙනවා.
කෙසේවෙතත් හෙරොයින් ජාවාරම්කරුවෙකු වන රාගම බටුවත්තේ චාමර නැමැත්තා ඩුබායි රාජ්‍ය වෙත පලාගොස් සිටින බවයි වාර්තා වන්නේ.
මෙම වෙඩි තැබීම සම්බන්ධයෙන් ජාඇල පොලිසිය විසින් විමර්ශන ආරම්භ කර තිබෙනවා.
