2020 වසරේ සිට මේ දක්වා කාලය තුළ සෞඛ්‍ය වෘත්තිකයින් 4,300කට ආසන්න පිරිසක් රට අතහැර ගොස් ඇතැයි පාර්ලිමේන්තු මන්ත්‍රී දොස්තර කාවින්ද ජයවර්ධන මහතා පවසනවා.
ඒ, පාර්ලිමේන්තුවේ මේ වන විට පැවැත්වෙන සෞඛ්‍ය හා ජනමාධ්‍ය අමාත්‍යංශයේ වැය ශීර්ෂයට එක්වෙමින්.
වෛද්‍යවරුන් ඇතුළු සෞඛ්‍ය වෘත්තිකයින්ගේ දීමනා ගැටලුව සම්බන්ධයෙන් මීට වඩා සංවේදී විය යුතු බවයි මන්ත්‍රීවරයා මෙහිදී සඳහන් කළේ.
ඊට ප්‍රතිචාර දක්වමින් විෂයභාර අමාත්‍ය වෛද්‍ය නලින්ද ජයතිස්ස මහතා පැවසුවේ වත්මන් ආණ්ඩුව වෛද්‍යවරුන්ට උපරිම වැටුප් වැඩිවීමක් ලබා දී ඇති බවයි.
එහිදී අදහස් දැක්වූ විපක්ෂ නායක සජිත් ප්‍රේමදාස මහතා සඳහන් කළේ වෛද්‍යවරුන් සීග්‍රයෙන් රට හැරයමින් ඇති බවයි.
සෞඛ්‍ය ක්ෂේත්‍රයේ පුරප්පාඩු සම්පූර්ණ කිරීම සඳහා කඩිනමින් පියවර ගන්නා බවයි අමාත්‍ය වෛද්‍ය නලින්ද ජයතිස්ස මහතා මෙහිදී පැවසුවේ.
මේ අතර ජනමාධ්‍යවේදීන්ගේ වෘත්තීයභාවය ඉහළ නැංවීම සඳහා වරලත් ආයතනයක් බිහි කිරීමට පියවර ගන්නා බවද අමාත්‍යවරයා විවාදයට එක්වෙමින් සඳහන් කළා.
සෞඛ්‍ය හා ජනමාධ්‍ය අමාත්‍යංශයේ වැය ශීර්ෂය පාර්ලිමේන්තුවේදී මේ වන විටත් පැවැත්වෙන අතර එහි සජීවී දර්ශන නෙත් නිවුස් යූ ටියුබ් නාලිකාවට පිවිස නැරඹිය හැකියි.
