ඇමරිකා එක්සත් ජනපදය විසින් අප රටට පනවා ඇති බදු ප්‍රතිපත්ති වැනි ජාත්‍යන්තරයෙන් අප රටට එල්ලවන අභියෝගයන්ට මුහුණදීමට නම් ජාත්‍යන්තර දේශපාලනය පිළිබඳ මනා අවබෝධයක් තිබිය යුතු බව එක්සත් ජාතික පක්ෂ සභාපති, හිටපු අමාත්‍ය වජිර අබේවර්ධන මහතා පවසනවා
එසේම රටේ පාලක පක්ෂයට ජාත්‍යන්තර දේශපාලනය පිළිබඳව මනා අවබෝධයක් නැතිනම් නුදුරේදීම රට ඉතාම ඛේදවාචකයකට ගමන් කරනු ඇති බවද ඒ මහතා පවසා සිටියා.
එක්සත් ජාතික පක්ෂ සභාපති, හිටපු අමාත්‍ය වජිර අබේවර්ධ මහතා මාධ්‍යට මෙම අදහස් පළකර සිටියේ ත්‍රිකුණාමලය නගර සභා ශ්‍රවණාගාරයේ පැවැති ත්‍රිකුණාමල දිස්ත්‍රික් පළාත් පාලන අපෙක්ෂක හමුවකින් අනතුරුවයි.
එහිදී තවදුරටත් අදහස් දැක්වූ ඒ මහතා මෙසේද කීය.
" අද අපි මේ උතුරු නැගෙනහිර පළාත් පාලන අපෙක්ෂකයින් සමග පවත්වන සිව්වැනි රැස්වීම තමයි පැවැත්වුවේ.
එක්සත් ජාතික පක්ෂ මුළු ලංකාව පුරාම අලියා ලකුණ යටතේ තරඟ කරනවා.
ඒ අනුව උතුරු පළාතෙත්, නැගෙනහිර පළාතෙත්, අපේ පක්ෂයේ ප්‍රධානින් සියලු දෙනාම මේ අවස්ථාවේ පාක්ෂිකයන් දැනුවත් කරමින් යනවා.
අපි ඒ මැතිවරණ කටයුුතු මෙහෙයවමින් තිබෙන්නෙ.
ත්‍රිකුණාමලය දිස්ත්‍රික්කයේ අපිට ශක්තිමත් අපේක්ෂකයෝ කණ්ඩායමක් ඉන්නවා, පළපුරුදු අය ඉන්නවා.
ප්‍රාදේශීය සභාවල හිටපු මන්ත්‍රීවරු ඉන්නවා. තරඟ කරපු පැරණි අපේක්ෂකයෝ ඉන්නවා.
මේ සියලු දෙනාම ගෙයින් ගෙට යන ව්‍යාපාරයත්, ඒ වගේම එක්සත් ජාතික පක්ෂයෙන් දෙන පණිවුඩයත් ගෙනයාම සඳහා අපි දැනුවත් කිරීමේ ක්‍රියාවලිය ක්‍රියාත්මක කළා.
විශේෂයෙන් අපි එක දෙයක් මතක තබාගත යුතුයි.
මීට අවුරුදු දෙක හමාරකට පෙර දරුණු ආර්ථික අර්බුධයකට ලක්වුණු රටක් රනිල් වික්‍රමසිංහ මැතිතුමා තමයි අද මේ තත්ත්වය ගෙනවිත් තිබෙන්නේ.
අද බලන්න ඇමරිකා එක්සත් ජනපදය විසින් අපේ රට විශාල බදු ප්‍රමාණයක් පනවලා තිබෙනවා.
මුළු ලෝකයේම රටවල් දිහා බැලුවම, රටවල් හතර පහකට තමයි මේ තත්වය උදාවෙලා තිබෙන්නේ.
රනිල් වික්‍රමසිංහ නායකතුමා ඒ ගැන අධ්‍යනය කරමින් ඉන්නවා.
එතුමා මීට දින කිහිපයකට පෙරත් ප්‍රකාශයක් කළා ඇමරිකාව විසින් පනවන්නට නියමිතව තිබෙන මේ බදු ප්‍රතිපත්තිය ගැන සහ ඉන් මුළු ලෝකයටම එල්ලවන බලපෑම ගැන.
විශේෂයෙන්ම රජයක වගකීම තමයි මෙවැනි තත්ත්වයක් ඇතිවීමට ප්‍රථම පසුගිය මාස පහේ හයේ ජාත්‍යන්තර දේශපාලනය පිළිබඳව හොඳ අධ්‍යයනයකින් කටයුතු කිරීම.
ඒ සඳහා තමයි ජාත්‍යන්තර හැසිරවීම පිළිබඳ පළපුරුද්ද වැදගත් වෙන්නේ, අත්දැකීම වැදගත් වෙන්නේ.
ඒ නිසයි රනිල් වික්‍රමසිංහ ජනාධිපතිතුමා මුලදිම ප්‍රකාශ කළේ.
මෝදි අගමැතිතුමා ශ්‍රී ලංකාවට පැමිණීම ඉතා වැදගත් කියලා.
එතුමා 2019 වසරේදීත් ලංකාවට පැමිණියා.
ඇතැම් කොටස් එතුමා පැමිණෙනකොට ඒ අවස්ථාවේ විරෝධය දැක්වුවා.
ඒ වගේම අපේ අසල්වැසියා අපට ප්‍රශ්නයක් වුනාම හැමදාම උදව් උපකාර කරන රාජ්‍යයක් හැටයට රනිල් වික්‍රමසිංහ ජනාධිපතිතුමත් මෝදි අගමැතිතුමත් රාජ්‍ය තාන්ත්‍රිකව අත්සන් තබා ඇති ගිවිසුම් සම්බන්ධයෙන් රාජ්‍ය තාන්ත්‍රිකව ක්‍රියා කළ යුතුයි.
ඒවා ආරක්ෂා කරගත යුතුයි.
මොකද අපි බිලියන 2 පමණ ආයෝජන ඉන්දියානු රාජ්‍ය සමග ගිවිසුම්ගත වෙලා තිබෙනවා.
ඒවා ආරක්ෂා කරගෙන ඉදිරියට යා යුතුයි.
එහෙම නැතිවුනොත් මහජනයාට විදුලිය නැති වෙයි.
ප්‍රශ්න ඇතිවෙයි.
ආර්ථිකය කඩන් වැටෙයි.
ජාත්‍යන්තර මූල්‍ය අරමුදලේ ප්‍රශ්න ඇතිවෙයි.
ඒ නිසා මෝදි අගමැතිතුමත් රනිල් වික්‍රමසිංහ ජනාධිපතිතුමත් අත්සන් කරපු රාජ්‍ය තාන්ත්‍රික ගිවිසුම් පිළිබඳ දේශපාලන වශයෙන් බලන්න හොඳ නැහැ,
ඒවා පිළිබඳව රාජ්‍ය තාන්ත්‍රික වශයෙන් ක්‍රියා කළ යුතුයි කියන එකයි එතුමා පැමිණෙන අවස්ථාවේ මතක් කරන්න තිබෙන්නෙ.
ඒ අනුව ගියොත් ශ්‍රී ලංකාවට අනාගතයක් තිබෙයි."
