තෙදින නිල සංචාරයක් සදහා ඉන්දීය අග්‍රාමාත්‍ය නරේන්ද්‍ර මෝදි මහතා අද රාත්‍රියේ දිවයිනට පැමිණීමට නියමිතව තිබෙනවා.
රාත්‍රී 07යි 25ට පමණ ඉන්දීය අග්‍රාමාත්‍යවරයා රැගත් ගුවන් යානය කටුනායක ගුවන්තොටුපලට ළඟා වීමට නියමිතයි.
ඉන්දීය අග්‍රාමාත්‍ය නරේන්ද්‍ර මෝදි මහතා කටුනායක ගුවන් තොටුපොළේ දී මහත් හරසරින් පිළිගැනීමට මේ වනවිටත් සියලු කටයුතු සූදානම් කර ඇති බවයි නෙත් නිවුස් ගුවන් තොටුපළ වාර්තාකරු පැවසුවේ.
තායිලන්තයේ බැංකොක් නුවර සිට පැමිණෙන ඉන්දීය අග්‍රාමාත්‍යවරයා රැගත් විශේෂ ගුවන් යානය වෙනුවෙන්, කටුනායක ගුවන් තොටුපොළ වෙත පැමිණෙන සහ පිටත්ව යන ගුවන් යානාවල කාළසටහන ද මද වෙනසකට ලක් කර ඇති බව නෙත් නිවුස් වාර්තාකරු පැවසුවා.
ඉන්දීය අග්‍රාමාත්‍යවරයාට ආරක්ෂිතව ගමන් කිරිම සදහා විශේෂිත “ලිමොසින්” වර්ගයට අයත් ප්‍රභූ ආරක්ෂක මෝටර් රථයක් මෙන්ම, එම රථ පෙළෙහි ආරක්ෂාව සදහා ගමන් කිරිමට තවත් ආරක්ෂක පරිවාර රථ සමූහයක් ද කටුනායක ගුවන් තොටුපොළ ගෙන්වා තිබෙනවා.
ඉන්දීය ගුවන් හමුදාවට අයත් හෙලිකොප්ටර් යානා පෙළක් ද කටුනායක ගුවන් තොටුපොළ වෙත පැමිණ ඇති අතර ඉන්දීය ආරක්ෂක නිලධාරීන් විශාල පිරිසක්ද කටුනායක ගුවන් තොටුපොළ සහ ඒ අවට ප්‍රදේශයේ රාජකාරී සදහා යොදවා ඇති බවයි නෙත් නිවුස් ගුවන් තොටුපොළ වාර්තාකරු වැඩිදුරටත් සඳහන් කළේ.
කටුනායක ගුවන් තොටුපොළ සිට කොළඹ කටුනායක අධිවේගී මාර්ගය දක්වාත්, ගුවන් තොටුපොළ සිට මග දෙපස ඉන්දීය අග්‍රාමාත්‍යවරයාගේ ඡායාරූප සහ දෙරටේ ජාතික ධජවලින් සරසා තිබෙනවා.
ඉන්දීය අග්‍රාමාත්‍යවරයාගේ සම්ප්‍රාප්තිය හේතුවෙන් අද පස්වරු 06.00 සිට රාත්‍රී 10.00 දක්වා කාළය තුළ කොළඹ - කටුනායක අධිවේගී මාර්ගය සහ බේස්ලයින් මාර්ගය වරින් වර වසා තැබීමට සිදු වන බව පොලීසිය සඳහන් කළා.
