ඉන්දීය අග්‍රාමාත්‍ය නරේන්ද්‍ර මෝදි මහතාගේ ශ්‍රී ලංකා සංචාරය හේතුවෙන් අද පස්වරුවේද විශේෂ රථවාහන සැලැස්මක් ක්‍රියාත්මකයි.
ඒ අනුව පස්වරු 04 සිට ගාලු මුවදොර සිට පැලවත්ත අපේගම පරිශ්‍රය දක්වා වූ මාර්ගයන් කිහිපයක් වසා තැබෙන බවයි පොලීසිය පැවසුවේ.
ගාලු මුවදොර වටරවුම, කොල්ලුපිටිය හන්දිය, ධර්මපාල මාවත, ලිබර්ටි වටරවුම, පිත්තල හන්දිය, පුස්තකාල හන්දිය සහ ආනන්ද කුමාරස්වාමි මාවත හරහා ඉන්දීය අග්‍රාමාත්‍යවරයා ගමන් කිරීමට නියමිතයි.
එමෙන්ම නෙළුම් පොකුණ වටරවුම, හෝර්ටන් කින්ස්ලි හන්දිය, ඩඩ්ලි සේනානායක මාවත, ඩී එස් හන්දිය, මොඩ්ල් ෆාම් හන්දිය, කාර්සල් වීදිය, ආයුර්වේද හන්දිය, ශ්‍රී ජයවර්ධනපුර මාර්ගය, පොල්දූව හන්දිය, පාර්ලිමේන්තු මාර්ගය හරහා අපේගම පරිශ්‍රය වෙත ඉන්දීය අග්‍රාමාත්‍යවරයා පැමිණෙන බවයි පොලීසිය පැවසුවේ.
ඒ අනුව පස්වරු 04 සිට ඉන්දීය අග්‍රාමාත්‍ය නරේන්ද්‍ර මෝදි මහතා ආපසු යන තෙක් එම මාර්ගයන් වරින්වර වසා තැබෙනු ඇති.
විකල්ප මාර්ග ලෙස බණ්ඩාරනායකපුර හන්දිය, කොටාපාර ඔස්සේ බුද්ගම්ව අඹගහ හන්දියෙන් දකුණට හැරී කොස්වත්ත හන්දියෙන් කඩුවෙල දෙසට කොළඹින් පිටවන රථවාහන ධාවනය කළ හැකි වනවා.
එමෙන්ම පරණ කොටාපාර ඔස්සේ වැලිකඩ හන්දිය, නාවල පාර ඔස්සේ හයිලෙවල් මාර්ගයටද පිවිසිය හැකි බවයි පොලීසිය පැවසුවේ.
කොළඹට ඇතුල්වන වාහන පැලවත්ත පාලම් තුන මංසන්ධියෙන් දකුණට හැරී කොස්වත්ත මාර්ගයේ අඹගහ හන්දියෙන් දකුණට හැරී අයි ඩී එච් හරහා පරණ අවිස්සාවේල්ල මාර්ගයෙන් ධාවනය කළ හැකි වනවා.
මේ අතර ගාලු මවදොර සිට ජනාධිපති මන්දිරය දක්වා ඉන්දීය අග්‍රාමාත්‍යවරයා ගමන් කිරිමට නියමිතව තිබෙනවා.
ඒ අනුව ගාලු මැද පාර එන් එස් ඒ වටරවුම ජනාධිපති මන්දිරය දක්වා පස්වරු 06 සිට ඉන්දීය අග්‍රාමාත්‍යවරයා යළි පැමිණෙන තෙක් වසා දැමෙන බවයි පොලීසිය පැවසුවේ.
කොළඹට ඇතුළු වන වාහන සඳහා කොල්ලුපිටිය හන්දිය, පිත්තල හන්දියෙන් වමට හැරී ගංගාරාමය හරහා කොම්පඤ්ඤ වීදිය හන්දිය, සෙරමික් හන්දියෙන් කොළඹට ඇතුළුවිය හැකියි.
කොළඹින් පිටවන වාහන සඳහාද එම මාර්ග භාවිත කළ හැකි බවයි පොලීසිය වැඩිදුරටත් පැවසුවේ.
