වැලිකඩ බන්ධනාගාරයේ සිදු වූ වෙඩි තැබීමකින් රැඳවූවන් 27 දෙනෙකු මියයාම සම්බන්ධයෙන් විධිමත් පරීක්ෂණයක් පවත්වන්නැයි ඉල්ලා ගොනු කළ රීට් පෙත්සම සැප්තැම්බර් මස 12 වැනි දා සලකා බැලීමට අභියාචනාධිකරණය අද (28) තීරණය කළා. අදාල වෙඩි තැබීම සිදු වූයේ ඉකුත් 2012 වසරේදීයි.
පොලිස්පතිවරයාට සහ අපරාධ පරීක්ෂණ දෙපාර්තමේන්තුවේ අධ්‍යක්ෂවරයාට නියෝගයක් නිකුත් කරන ලෙසටයි එම පෙත්සම මගින් ඉල්ලා ඇත්තේ.
මෙම පෙත්සම අද (28) අභියාචනාධිකරණයේ සභාපති විනිසුරු එල් ටී බී දෙහිදෙනිය මහතා ඉදිරියේ කැඳවූ අවස්ථාවේ පෙත්සම්කාර පාර්ශවය පෙත්සම සලකා බැලීමට වෙනත් දිනයක් ඉල්ලා සිටියා.
සුදේශ් නන්දිමාල් සිල්වා නැත්තෙක් විසිනුයි පෙත්සම ගොනු ඇත්තේ.
වැලිකඩ බන්ධනාගාරයේ සිදුවීම රැඳවියෙකු ලෙසට සියැසින්ම දුටු බවයි ඔහු පෙත්සමේ සඳහන් කර තිබෙන්නේ.
මෙම සිද්ධිය සම්බන්ධයෙන් පැමිණිලි සිදු කළ ද පොලිසිය විසින් නිසි පරීක්ෂණයක් ආරම්භ කර නොමැති බව පෙත්සම්කරු චෝදනා කර තිබෙනවා.
පොලිස් විශේෂ කාර්ය බලකාය විසින් සිදු කළ මෙහෙයුමක් අතර රැඳවියන් සහ ඔවුන් අතර ගැටුම පාලනය කිරීමට යුධ හමුදාව කැඳවීමෙන් අනතුරුව මෙම රැඳවියන් පිරිස ඝාතනය වූ බවට පෙත්සම්කරු ප්‍රකාශ කර තිබෙනවා.
