රාජ්‍ය තාන්ත්‍රික සේවයේ නියුතු නිලධාරීන් මෙරටට පැමිණීමේදී මෙරට සිදුකරනු ලබන නිරෝධායන ක්‍රියාමාර්ගයන්, සහ PCR පරීක්ෂණ සම්බන්ධයෙන් ජනාධිපති ලේකම් කාර්යාලය විසින් සංශෝධිත උපදෙස් මාලාවක් නිකුත් කර තිබෙනවා.
සංශෝධනය කරනු ලැබූ එම උපදෙස් මාලාව සම්බන්ධයෙන් විදේශ කටයුතු අමාත්‍යාංශය විසින් සියලු රාජ්‍ය තාන්ත්‍රික දුත මණ්ඩල, එක්සත් ජාතීන්ගේ නියෝජිත කාර්යාලය සහ ඊට අනුබද්ධ නියෝජිත කාර්යාල, ජාත්‍යන්තර සංවිධාන සහ මෙරට පිහිටි කොන්සල් කාර්යාල වෙත දැනුවත් කිරීමට පියවර ගෙන ඇත.
ඒ අනුව :
1). මෙරටට පැමිණෙන රාජ්‍ය තාන්ත්‍රික දුත මණ්ඩල සාමාජිකයින් සහ ඔවුන්ගේ පවුල්වල සාමාජිකයින් කල්තියාම තම තොරතුරු විදේශ කටයුතු අමාත්‍යාංශයට ලිඛිතව දන්වා ඊට අනුමැතිය ලබා ගත යුතුය.
2). එලෙස පැමිණෙන රාජ්‍ය තාන්ත්‍රික නිලධාරීන් සහ ඔවුන්ගේ පවුල්වල සාමාජිකයින් ඔවුන් මෙරටට පැමිණීමට පැය 72කට පෙර තමන් පැමිණෙන රටෙන් ලබා ගනු ලැබූ PCR පරීක්ෂණ වාර්තාවක් ඉදිරිපත් කිරීම අනිවාර්ය කොට ඇත.
3).රාජ්‍ය තාන්ත්‍රික නිලධාරීන් සහ ඔවුන්ගේ පවුලේ සාමාජිකයින්ට PCR පරීක්ෂණ වාර්තා ලබා දීමට නොහැකි වුවහොත් ඔවුන් කටුනායක බණ්ඩාරනායක ජාත්‍යන්තර ගුවන්තොටුපලේදී අනිවාර්ය PCR පරීක්ෂණයකට භාජනය කරනු ඇත.
4).දූත මණ්ඩල ප්‍රධානීන් සහ පවුලේ සාමාජිකයන් නිල නිවාසවල ස්වයං නිරෝධායනය කරනු ඇත. පැමිණෙන අනෙකුත් සියලුම රාජ්‍ය තාන්ත්‍රික කාර්ය මණ්ඩල සේවකයින්ට සහ ඔවුන්ගේ පවුලේ සාමාජිකයින්ට ශ්‍රී ලංකා රජය විසින් නිර්දේශ කරනු ලබන හෝටලයක නිරෝධායන ක්‍රියා පටිපාටීන් අනුගමනය කළ යුතුය.
5). දින 14 ක නිවාස නිරෝධායනය අවසන් වූ වහාම ඒ සම්බන්ධයෙන් රාජ්‍ය තාන්ත්‍රික දූත මණ්ඩල නියෝජිතයින් විදේශ කටයුතු අමාත්‍යාංශයට දැනුම් දිය යුතුය. එමෙන්ම නැවත සේවය ආරම්භ කිරීමට පෙර අදාළ තානාපති කාර්යාලය විසින් සිදු කරන ලද දෙවන PCR පරීක්ෂණය සිදුකොට එම වාර්තාව විදේශ කටයුතු අමාත්‍යාංශය වෙත ඉදිරිපත් කළ යුතුය. එම පියවර ගනු ලබන්නේ කොරොන වෛරසය පැතිරීම පාලනය කිරීම සහ වළක්වා ගැනීමේ අරමුණින්ය.
6). රාජ්‍ය තාන්ත්‍රික දූත මණ්ඩල නිලධාරීන්, රාජ්‍ය තාන්ත්‍රික කාර්ය මණ්ඩලයේ නිලධාරීන් සහ ඔවුන්ගේ පවුලේ සාමාජිකයින්ගේ ගමන් විස්තර අවම වශයෙන් පැය 48 කට පෙර විදේශ කටයුතු අමාත්‍යාංශයේ ප්‍රධාන නිලධාරියා වෙත යැවිය යුතුය.
