ඇෆ්ගනිස්තානය හා පාකිස්තානය අතර පවතින උපායමාර්ගික වශයෙන් වැදගත් දේශ සීමාවක බලය තමන් විසින් අත්පත් කරගත් බව තලෙයිබාන් සංවිධානය පවසනවා. ඒ අනුව තලෙයිබාන් සංවිධානය විසින් එම දේශසීමාව අසල සිය ධජය ඔසවා තබා ඇති බවයි විදෙස් මාධ්‍ය වාර්තා කළේ.
අදාළ දේශසීමාව යැයි පැවසෙන ස්ථානයක තලෙයිබාන් සංවිධානයේ ධජය ළෙලදෙන අයුරු දැක්වෙන විඩියෝ පට පවා ඇතැම් විදෙස් මාධ්‍ය මේවනවිට පළ කර තිබෙනවා. අදාළ ස්ථානයේ ඇෆ්ගනිස්තානයට අයත් කොටසේ ගිනි අවි රැගත් තලෙයිබාන් සාමාජිකයින් සිටින අයුරු හා ඔවුන් පකිස්තානයේ දේශ සීමා ආරක්ෂක භට පිරිස් සමග සාකච්ඡා කරමින් සිටින අයුරු දැක්වෙන වීඩියෝ පටද විදෙස් මාධ්‍ය මගින් පළ කර තිබෙනවා.
කෙසේවෙතත් අදාළ දේශසීමාවේ බලය තලෙයිබාන් සංවිධානය විසින් අත්පත් කරගෙන ඇති බවට පළ වන වාර්තා ප්‍රතික්ෂේප කරන බවයි ඇෆ්ගන් රජය පවසන්නේ. ඇෆ්ගනිස්තානයේ ප්‍රාන්තවලින් තුනෙන් එකක කොටසක් මේවනවිටත් පවතින්නේ තලෙයිබාන් සංවිධානයේ පාලනය යටතේයි. තවත් ප්‍රදේශ කිහිපයක රජයේ හමුදාව හා තලෙයිබාන් සංවිධානය අතර ගැටුම් පවතින බව ද පැවසෙනවා.
දශක 02 ක පමණ කාලයක් පුරා අමෙරිකානු හමුදාව විසින් තලෙයිබාන් සංවිධානය ඇෆ්ගනිස්තානයෙන් පළවා හැරීමට ප්‍රබල මෙහෙයුමක් දියත් කළා. කෙසේවෙතත් අමෙරිකානු හමුදාව ඇෆ්ගනිස්තානයෙන් පිටවීමට තීරණය කිරීමත් සමඟ තලෙයිබාන් සංවිධානය යළිත් ශක්තිමත් වෙමින් එරට බලය අල්ලා ගැනීමේ උපක්‍රමයක නිරත වී සිටිනවා.
