වසරකට අධික කාලයකට පසු ජෝ රූට් යළිත් වරක් එක්දින සංචිතයට කැඳවීමට එංගලන්ත ක්‍රිකට් තේරීම් කමිටුව තීරණය කර තිබෙනවා.
ඒ, එංගලන්තය කණ්ඩායම ලබන වසර ආරම්භයේදී සිදු කිරීමට නියමිත ඉන්දීය සංචාරය සහ ඉන් අනතුරුව ආරම්භ වන ‘ශූරයන්ගේ කුසලානය’ වෙනුවෙන්. ජෝ රූට් එංගලන්තය වෙනුවෙන් අවසන් වරට එක්දින තරගාවලියකට එක්ව ඇත්තේ 2023 වසරේදීයි.
ඒ, එක්දින ලෝක කුසලාන ක්‍රිකට් තරගාවලිය සඳහායි. එක්දින පිටියේ කැපී පෙනෙන පිතිකරුවෙකු වූ ජෝ රූට් එංගලන්තය නියෝජනය කරමින් එක්දින ඉනිම් 160 කදී රැස්කර ඇති ලකුණු සංඛ්‍යාව 6,522 ක්. ඊට ශතක 16 ක් හා අර්ධ ශතක 39 ක් ඇතුළත්.
ටෙස්ට් පිටියේ ද ඉදිරියෙන් පසුවන ඔහු ශතක 36 ක් හා අර්ධ ශතක 65 ක් සමඟ ටෙස්ට් ලකුණු 12,972 ක් රැස්කර තිබෙනවා.
