Friday, April 4, 2025

General line - 0115112241

ක්ලබ් වසන්තගේ දේහය කොළඹ තබා ගැනීමට තීරණයක්



අතුරුගිරියේ ටැටූ මධ්‍යස්ථානයේදී ඉකුත් දා සිදුවූ වෙඩි ප්‍රහාරයකට ලක්ව ජීවිතක්ෂයට පත්වූ සුරේන්ද්‍ර වසන්ත පෙරේරා නොහොත් ක්ලබ් වසන්තගේ දේහය මේ වන විට බොරැල්ල පෞද්ගලික මල් ශාලාවක තැන්පත් කර තිබෙනවා.

ඔහුගේ දේහය දින දෙකක් පුරා නිවසට රැගෙන නොගොස් එම පෞද්ගලික මල් ශාලාවේම තැන්පත් කිරීමට තීරණය කර ඇති බවයි වාර්තා වන්නේ.

ඒ, ජීවිතක්ෂයට පත්වූ ක්ලබ් වසන්තගේ දෙවන පුත්‍රයා විදේශගතව සිටින බැවින්.

ඔහු මෙරටට පැමිණෙන තෙක් දේහය එලෙස පෞද්ගලික මල් ශාලාවේම තැන්පත් කිරීමට තීරණය කර ඇති බව වාර්තා වනවා.

ව්‍යාපාරිකයකු වූ ක්ලබ් වසන්ත, ඉකුත් සඳුදා අතුරුගිරියේ පිහිටි ටැටූ මධ්‍යස්ථානයක් විවෘත කිරීමකට එක් වූ අවස්ථාවේදී පැමිණි නාඳුනන වෙඩික්කරුවන් දෙදෙනෙකු විසින් සිදු කළ වෙඩි තැබීමකින් ජීවිතක්ෂයට පත්වුණා.

ඔහුගේ ඝාතනය සම්බන්ධයෙන් අත්අඩංගුවට ගත් සැකකරුවන් 07 දෙනා ලබන 22වනදා දක්වා ඊයේ රක්ෂිත බන්ධනාගාරගත කළා.

ඒ අතරට ටැටූ මධ්‍යස්ථානයේ හිමිකරු වන දුලාන් සන්ජුල නමැත්තාද අයත්.

ඔවුන් ඊයේ රාත්‍රී 08ට පමණ රැගෙන විත් ඇත්තේ කොළඹ රිමාන්ඩ් බන්ධනාගාරය වෙතයි.

මේ අතර, ක්ලබ් වසන්ත ඝාතන සිද්ධියේදී වෙඩි වැදී මිය ගිය නයන වාසුලගේ දේහය පිළිබඳ අවසන් කටයුතු ඊයේ පස්වරුවේ තලාහේන පොදු සුසාන භූමියේදී සිදුකෙරුණා.