කොළඹ නගරයේ මහල් නිවාසවල ජීවත්වන අඩුආදායම්ලාභී පවුල් 50000කට හිමිකම් ඔප්පු ලබාදීමේ "රන්දොර උරුමය" වැඩ සටහන ජනාධිපති රනිල් වික්‍රමසිංහ මහතාගේ ප්‍රධානත්වයෙන් කොළඹ,සුගතදාස ගෘහස්ත ක්‍රීඩාංගණයේදී හෙට (17) දින පස්වරු 3.00 ට පැවැත්වීමට නියමිතයි.
ආණ්ඩු පක්ෂයේ ප්‍රධාන සංවිධායක,නාගරික සංවර්ධන හා නිවාස අමාත්‍ය ප්‍රසන්න රණතුංග සඳහන් කළේ මෙහි පළමු අදියර යටතේ " රන්දොර උරුමය" හිමිකම් ඔප්පු 1117ක් ලබාදීමට නියමිත බවයි
ඒ නාගරික සංවර්ධන අධිකාරිය යටතේ ඇති මහල් නිවාස 937 කට හා ජාතික නිවාස සංවර්ධන අධිකාරිය යටතේ ඇති මහල් නිවාස 180 කට වශයෙනි.
ඒ අනුව නාගරික සංවර්ධන අධිකාරියට අයත් මිහිඳු සෙත්පුර,සිරිසර උයන,මෙට්ට්‍රෝ නිවාස සංකීර්ණවල නිවැසියන්ට හා ජාතික නිවාස සංවර්ධන අධිකාරිය යටතේ ඇති, මහල් නිවාස තිස් එකක නිවැසියන්ට මෙම "රන්දොර උරුමය" හිමිකම් ඔප්පු ලබාදීමට නියමිතය.
ජනාධිපති රනිල් වික්‍රමසිංහ මහතාගේ 2024 අයවැය යෝජනාවකට අනුව ලක්ෂ 20ක ජනතාවකට සින්නක්කර ඉඩම් අයිතිය ලබාදෙන "රන්දොර උරුමය" ඔප්පු ලබාදීමේ වැඩසටහනේ තවත් අදියරක් ලෙස කොළඹ නගරයේ මහල් නිවාසවල ජීවත්වන අඩු ආදායම්ලාභී පවුල් ලක්ෂ දෙකහමාරකට එම නිවාසවල පූර්ණ සින්නක්කර අයිතිය ලබාදෙමින් "රන්දොර උරුමය" ඔප්පු ලබාදීමේ වැඩසටහන ක්‍රියාත්මක කරන බවද අමාත්‍ය ප්‍රසන්න රණතුංග වැඩි දුරටත් සඳහන් කර සිටියා.
රන්දොර උරුමය සින්නක්කර ඔප්පු ලබාදිමේ ව්‍යාපෘතිය ජනාධිපති රනිල් වික්‍රමසිංහ මහතාගේ 2024 අයවැය පොරොන්දු ඉටුකිරීමක් මිස මේ තුළ කිසිදු සැඟවුණු දේශපාලන උවමනාවක් නැතැයි කී අමාත්‍ය ප්‍රසන්න රණතුංග මෙය රජයන් ගණනාවකට සිදුකළ නොහැකිවූ කාර්යයක් බවද සඳහන් කර සිටියා.
