පේරාදෙණිය විශ්වවිද්‍යාලයීය පුස්තකාලයේ ඇති මහාවංශය පුස්කොළ පොත ලෝක උරුමයක් ලෙස නිල වශයෙන් ප්‍රකාශයට පත්කර තිබෙනවා.
ඒ සඳහා වන ලෝක උරුම සහතිකය පිරිනැමීම ඊයේ පස්වරුවේ සිදු වුණේ විශ්වවිද්‍යාලයේ පැවැති උත්සවයකදීයි.
මහාවංශය පුස්කොළ පොත, ලෝක උරුමයක් බවට පත් කිරීම දක්වා වූ ගමන පිළිබඳව පේරාදෙණිය විශ්වවිද්‍යාලයේ ඉතිහාස අධ්‍යයන අංශයේ අංශාධිපති මහාචාර්ය රෝහිත දසනායක මෙලෙස අදහස් පළ කළා.
යුනෙස්කෝව මගින් ලෝක උරුමයක් ලෙස නම් කළ මහාවංශය, පත්ඉරු 238කින් සමන්විත බවත් එහි කිසිදු වෙනසක් නොමැතිව අඛණ්ඩව මෙරට ඉතිහාසය අන්තර්ගත වන බවත් මෙහිදී ප්‍රකාශ කෙරුණා.
ක්‍රිස්තු පූර්ව 06 වැනි සියවසේ සිට වර්ෂ 1815 දක්වා අඛණ්ඩව ලියවී තිබෙන ලෝකයේ ඇති පොත මෙය බවත් මෙහි ඇත්තේ එක් ජාතියක හා ආගමක ඉතිහාසය පමණක් බවට වරදවා වටහා නොගත යුතු බවත් මහාචාර්ය රෝහිත දසනායක ප්‍රකාශ කළා.
යුනෙස්කෝ සංවිධානය පවසන්නේ මහාවංශය, ශ්‍රී ලංකාවේ පමණක් නොව ලෝක ඉතිහාසය පිළිබඳ වැදගත් තොරතුරු රැසක් අඩංගු පුස්කොළ එකතුවක් බවයි.
එය මෙතෙක් කල් ආරක්ෂා කර ගැනීම සම්බන්ධවද යුනෙස්කෝ සංවිධානය සිය කෘතඥතාව පළ කර තිබෙනවා.
මහාවංශය, ලෝක උරුමයක් බවට පත් කළ යුතු බවට ප්‍රබල මතවාදයක් පළමුව ගොඩනැඟුවේ නෙත් එෆ් එම් රේඩියෝවයි.
2020 වසරේ ජනවාරි මාසයේ සිට නෙත් එෆ් එම් අන්ලිමිටඩ් හිස්ටි්‍ර වැඩසටහන හරහා මෙම මතවාදය ගොඩනැඟුවේ පුරාවිද්‍යාව පිළිබඳ ජ්‍යේෂ්ඨ මහාචාර්ය රාජ් සෝමදේවයන්ද සහභාගි කර ගනිමින්.
ඒ අනුව මහාවංශය, ලෝක උරුමයක් බවට පත් කළ යුතු බවට ජනතාව තුළ මෙන්ම විද්වතුන් මහ බලධාරීන් අතරද මතවාදයක් ගොඩනැඟුණා.
මහාවංශය, ලෝක උරුමයක් බවට පත් කළ යුතු බවට නෙත් එෆ් එම් අන්ලිමිටඩ් හිස්ටි්‍ර වැඩසටහන හරහා ගොඩනැඟූ එම මතවාදය අද සැබෑවීම සම්බන්ධයෙන් නෙත් එෆ් රේඩියෝවේ අපට ඇත්තේ නිහතමානී ආඩම්බරයක්.
