ක්ලබ් වසන්ත ඝාතනයට සම්බන්ධ වූ වෙඩික්කරුවන් රටින් පලා ගොස් ඇති බවට මෙතෙක් සිදු කළ විමර්ශනවලදී අනාවරණ වී නොමැති බව පොලිස් මාධ්‍ය ප්‍රකාශන නියෝජ්‍ය පොලිස්පති නිහාල් තල්දූව පවසනවා.
ඔහු කියා සිටියේ වෙඩි තැබීමට සම්බන්ධ වූ පුද්ගලයින් සක්‍රීය හමුදා සේවයේ සිටි පුද්ගලයින්දැයි මෙතෙක් අනාවරණ වී නොමැති බවයි.
මේ අතර, අතුරුගිරිය ප්‍රදේශයේදී ටැටූ මෝස්තර නිර්මාණ ආයතනය තුළ වෙඩි ප්‍රහාරයකට ලක්ව කළුබෝවිල රෝහලේ දැඩිසත්කාර ඒකකයේ ප්‍රතිකාර ලබන ක්ලබ් වසන්තගේ බිරිඳගේ නවතම සෞඛ්‍ය තත්ත්වය පිළිබඳ රෝහලින් සුබදායක ආරංචියක් වාර්තා වනවා.
පසුගිය දින කිහිපයට සාපේක්ෂව මේ වන විට ඇයගේ සෞඛ්‍ය තත්ත්වය යහපත් තත්ත්වයට හැරෙමින් පවතින බවයි රෝහල් ආරංචි මාර්ග පවසන්නේ. ඇයට අද දිනයේ තවත් සැත්කමක් කිරීමට නියමිත බවටද වාර්තා වනවා.
පසුගිය දින කිහිපය තුළම ඇය දැඩිසත්කාර ඒකකයේ යන්ත්‍ර ආධාරයෙන් හුස්ම ගැනීම සිදුකළා. එහෙත් මේ වනවිට ඇයගේ මුඛයෙන් සවිකර තිබූ නලය ද ඉවත් කිරීමටයි පියවර ගෙන ඇත්තේ.
මීට අමතරව ඇයට ප්‍රතිකාර ලබාදීම සඳහා යොදාගත් අනෙකුත් යන්ත්‍රවලින් එක් යන්ත්‍රයක් ද ඉවත් කර ඇති බව වාර්තා වනවා.
ඇය මීට පෙර පසුවූයේ ඇයගේ ඥාතීන් පවා හඳුනා ගැනීමට නොහැකි තරම් අසාධ්‍ය තත්ත්වයකයි. එහෙත් ඇයට පෙරේදා දිනයේ සිට ඥාතීන් සමඟ වචන ස්වල්පයක් කතා කිරීමේ හැකියාව ද ලැබී තිබෙනවා.
ක්ලබ් වසන්තගේ මව ද පසුගිය දින කිහිපය තුළම දැඩිසත්කාර ඒකකයට පැමිණ ඇයගේ සුවදුක් විමසා ඇතැයි සඳහන්.
ක්ලබ් වසන්තගේ බිරිඳ මවගෙන් ඉල්ලා ඇත්තේ තම පොඩි පුතණුවන් රෝහලට රැගෙන එන ලෙසයි. කෙසේවෙතත් පවතින ආරක්ෂක හේතූන් මත මෙතෙක් එම පුතණුවන් රෝහල වෙත පැමිණ නොමැති බවයි වාර්තා වන්නේ.
මීට අමතරව තවත් ඥාතීන් කිහිප දෙනෙකු ද පැමිණ ඇයගේ සුවදුක් විමසා තිබෙනවා.
කෙසේවෙතත් ක්ලබ් වසන්තගේ බිරිඳගේ උදරය ප්‍රදේශයට සහ කොදු ඇට පෙළට වෙඩි ප්‍රහාර 04ක් පමණ එල්ලවී තිබෙන බැවින් සිදුවූ තුවාල තවමත් බරපතල තත්ත්වයක පවතින බවයි වාර්තා වන්නේ.
වෙඩි ප්‍රහාර හේතුවෙන් ඇයගේ එක් අතක අස්ථියකට, පාදයකට සහ කොදු ඇට පෙළට බරපතල හානි සිදුව තිබෙනවා.
ඒ පිළිබඳ මෙතෙක් වෛද්‍යවරුන් වාර්තාවක් පවා ඉදිරිපත් කර නැහැ. පසුගිය දින කිහිපය තුළ කළුබෝවිල රෝහලේදී ඇයට සැත්කම් දෙකක් සිදුකර ඇති අතර එම සැත්කම් දෙක ද සාර්ථකව අවසන් කර තිබෙනවා.
ඇයගේ ආරක්ෂාව වෙනුවෙන් රෝහල ඇතුළත පොලිස් නිලධාරින් කිහිප දෙනෙකු ද රැඳී සිටින බවයි නෙත් නිවුස් වෙත වාර්තා වුණේ.
පසුගිය 08 වනදා අතුරුගිරිය ප්‍රදේශයේ සිදු වූ වෙඩි තැබීමෙන් ක්ලබ් වසන්ත සහ ජනප්‍රිය ගායන ශිල්පී කේ සුජීවාගේ සැමියා මිය ගිය අතර ජනප්‍රිය ගායන ශිල්පී කේ සුජිවා සහ ටැටූ ආයතනයේ හිමිකරුගේ බිරිඳ ද තුවාල ලබා රෝහල් ගත කෙරුණා.
