Saturday, April 5, 2025

General line - 0115112241

 ට්‍රම්ප්ගේ බදු නිසා අමෙරිකානු කොටස් වෙළඳපොළත් කඩා වැටෙයි



අමෙරිකානු ජනාධිපති ඩොනල්ඩ් ට්‍රම්ප් විසින් ලොව රටවල් රැසකට පැනවූ තීරුබදු හේතුවෙන් අමෙරිකානු කොටස් වෙළඳපොළ ගනුදෙනුද පහත බැස තිබෙනවා.

ඒ, ට්‍රම්ප්ගේ තීරුබදුවලට ප්‍රතිචාර දක්වන බවට චීනය සහ යුරෝපා රටවල් ප්‍රතිචාර දැක්වීමත් සමගයි.

අමෙරිකානු ජනාධිපතිවරයා විසින් නව තීරුබදු පැනවීම ප්‍රකාශයට පත් කළේ ඊයේ පස්වරුවේයි.

ඒ වන විට අමෙරිකානු කොටස් වෙළඳපොළේ එදිනට නියමිත කටයුතු අවසන්ව තිබුණා.

අද දිනයේ නැවත වරක් කොටස් වෙළඳපොළ විවෘත කිරීමත් සමග අමෙරිකානු කොටස් වෙළඳපොළේ විශාලතම සමාගම් 500 නිරීක්‍ෂණය කරන එස් ඇන්ඩ් පී දර්ශකය සියයට 4යි දශම 8කින් පහත වැටී ඇති බවයි විදෙස් මාධ්‍ය වාර්තාවල දැක්වෙන්නේ.

එය 2020 වසරේ කොවිඩ් වසංගත සමයේ ඇතිවූ ආර්ථික බිඳවැටීමෙන් පසු අමෙරිකානු කොටස් වෙළඳපොළේ නරකම දිනය ලෙසටයි විදෙස් මාධ්‍ය වාර්තාකර තිබුණේ.

නයික්, ඇපල් සහ ටාගට් යන විශාලතම සමාගම් සියයට 9කින් පමණ  පහත වැටී ඇති බවද එම වාර්තාවල සඳහන්. 

අමෙරිකානු ජනාධිපතිවරයා ඊයේ දිනයේ ලොව රටවල් රැසකට නව තීරුබදු පනවන බව ප්‍රකාශයට පත් කිරීමෙන් අනතුරුව තවත් රටවල් රැසක කොටස් වෙළපොළ ගනුදෙනුවල පසුබෑමක් ඇති වුණා.