Saturday, April 5, 2025

General line - 0115112241

 හිටපු මහබැංකු අධිපති කබ්රාල්ට එරෙහිව අල්ලස් කොමිසම ගොනුකළ නඩුවක් කැඳවීමට දින නියම වෙයි

උදය කුමාර



හිටපු මහ බැංකු අධිපති අජිත් නිවාඩ් කබ්රාල් මහතා ඇතුළු විත්තිකරුවන් හතර දෙනෙකුට එරෙහිව අල්ලස් කොමිසම විසින් ගොනුකර තිබෙන නඩුව  පූර්ව නඩු විභාග සම්මන්ත්‍රණය සඳහා ජුනි මස 26 වනදා කැඳවන ලෙස කොළඹ මහාධිකරණය අද නියම කළා.

ඒ, 2012 වසරේ ග්‍රීක බැඳුම්කරවල මුදල් ආයෝජනය කිරීම තුළින් රජයට රුපියල් බිලියන 1යි දශම 8කට අධික පාඩුවක් සිදු කළේ යැයි චෝදනා කරමින් ගොනු කළ නඩුවකට අදාළවයි.

මෙම නඩුව අද කොළඹ මහාධිකරණ විනිසුරු ආර්.එස්.එස් සපුවිද මහතා ඉදිරියේ කැඳවනු ලැබුවා.

එම නඩුවේ විත්තිකරුවෙකු වන මියගොස් සිටින චන්ද්‍රසිරි ජයසිංහ නමැත්තා මියගිය බව තහවුරු කිරීම සඳහා සාක්ෂි මෙහෙයවීම සිදුකෙරුණා.

ඉන් අනතුරුව විත්තිකරුවන්ට අදාළ චෝදනා පත්‍රය අල්ලස් කොමිසම විසින් සංශෝධනය කරනු ලැබුවා.

පසුව එම නඩුව පූර්ව නඩු විභාග සම්මන්ත්‍රණය සඳහා ජුනි මස 26 වනදා කැඳවන ලෙසයි නියම කෙරුණේ.