අධිකරණයට අපහාස කළේ යැයි චෝදනා කරමින් රක්ෂිත බන්ධනාගාරගත කර සිටින ආගමන හා විගමන පාලක හර්ෂ ඉලූක්පිටිය මහතා ඇප මත මුදාහරින ලෙස කරනු ලැබූ ඉල්ලීමක් ප්‍රතික්ෂේප කිරීමට ශ්‍රේෂ්ඨාධිකරණය අද තීන්දු කළා.
ප්‍රීති පද්මන් සූරසේන, ගාමිනී අමරසේකර යන විනිසුරුවරුන්ගේ එකඟත්වය ඇතිව ශ්‍රේෂ්ඨාධිකරණ විනිසුරු අචල වෙංගප්පුලි මහතා එම තීන්දුව ප්‍රකාශයට පත් කළා.
එම තීන්දුව ප්‍රකාශයට පත් කරමින් විනිසුරුවරයා සඳහන් කර සිටියේ මෙම කරුණට අදාළ නඩුකරය මැයි මස 08 වනදා විභාගයට ගැනීමට දැනටමත් අධිකරණය විසින් දින නියම කර තිබෙන බවයි.
එම වාතාවරණය මත වගඋත්තරකරු රක්ෂිත බන්ධනාගාර ගත කරමින් මීට පෙර නිකුත් කළ නියෝගය වෙනස් කිරීමේ අවශ්‍යතාවයක් මතු නොවන බවත් විනිසුරුවරයා සිය තීන්දුවෙන් පෙන්වා දුන්නා.
ඉකුත් රජය සමයේ විද්‍යුත් වීසා නිකුත් කිරීමේ කටයුතු පෞද්ගලික සමාගම් දෙකකට පැවරීමට අමාත්‍ය මණ්ඩලය විසින් ගනු ලැබූ තීරණය ක්‍රියාත්මක කිරීම වළක්වාලමින් අතුරු තහනම් නියෝගයක් නිකුත් කිරීමෙන් අනතුරුව විසා නිකුත් කිරීමේ පැරැණි ක්‍රමවේදය යළි ක්‍රියාවට නංවන ලෙස නිකුත් කරනු ලැබූ අතුරු තහනම් නියෝගයක් ක්‍රියාත්මක කිරීම පැහැර හැරීම තුළින් අධිකරණයට අපහාස කළේ යැයි චෝදනා කරමින් ආගමන හා විගමන පාලක හර්ෂ ඉලු‍ක්පිටිය මහතා මහතා රක්ෂිත බන්ධනාගාර ගත කරනු ලැබුවේ ඉකුත් වසරේ සැප්තැම්බර් මස 25 වනදායි.
