පුංචි ඡන්දයට ලී පෙට්ටි පමණක් යොදා ගැනීමට කොමිසමේ අවධානය

පළාත් පාලන ආයතන ඡන්ද විමසීමට අදාළව ඡන්ද පෙට්ටි සඳහා මෙවර ලී පෙට්ටි පමණක් යොදා ගැනීමට මැතිවරණ කොමිෂන් සභාවේ අවධානය යොමුව තිබෙනවා.

මීට පෙර මැතිවරණ සඳහා කාඩ්බොඩ් පෙට්ටි ද භාවිත කෙරුණා.

පවතින ලී පෙට්ටි මෙවර පළාත් පාලන ආයතන ඡන්ද විමසීම සඳහා ප්‍රමාණවත් බවයි එම කොමිෂන් සභාවේ උසස් නිලධාරියෙකු නෙත් නිවුස් කළ විමසීමකදී පැවසුවේ. 

මෙවර ස්ථාපිත කෙරෙන ඡන්ද මධ්‍යස්ථාන ගණන 13,000කට අධික වනවා.  

ඒ අනුව එම ඡන්ද මධ්‍යස්ථාන සඳහා ඡන්ද පෙට්ටි 25,000ක් පමණ අපේක්ෂා කෙරෙනු ඇති බවටයි මැතිවරණ කොමිෂන් සභාව විශ්වාස කරන්නේ. 

මේ අතර මෙවර ඡන්දය ප්‍රකාශ කිරීමෙන් අනතුරුව ඡන්ද දායකයින්ගේ වම් අතෙහි සුළඟිල්ල වර්ණ කිරීමට අවධානය යොමුකර ඇති බව මැතිවරණ කොමිෂන් සභාව පැවසුවා.

ඒ අනුව දම් පැහැති වර්ණය සුළඟිල්ලේ නියපොත්ත ආශ්‍රිතව වර්ණ කෙරෙණු ඇති.

ඒ සඳහා යොදා ගන්නා වර්ණකයන් ටෙන්ඩර් ක්‍රමවේදය හරහා ඇනවුම් කරන බවයි මැතිවරණ කොමිෂන් සභාව පැවසුවේ.

අඩුම මිල ගණන් ඉදිරිපත් කරන මෙරට සැපයුම්කරුවෙකුගෙන් හෝ විදේශීය සැපයුම්කරුවෙකුගෙන් එය ලබා ගැනීමට නියමිතයි.

මෙවර පළාත් පාලන ආයතන ඡන්ද විමසීම මැයි 06 වනදා පැවැත්වීමට නියමිත බවයි මැතිවරණ කොමිෂන් සභාව වැඩිදුරටත් පැවසුවේ.