එක්සත් ජාතීන්ගේ සරණාගත ඒජන්සියට අනුව, ආපසු හරවා යැවීමේ මුලපිරීමක කොටසක් ලෙස පාකිස්තානය විසින් සතියක් තුළ ඇෆ්ගනිස්ථාන පුරවැසියන් 8,000 කට අධික සංඛ්‍යාවක් නෙරපා හැර තිබේ.
නිසි ලියකියවිලි නොමැති සියලුම ඇෆ්ගන් ජාතිකයින්ට මාර්තු 31 වන විට ස්වේච්ඡාවෙන් ආපසු පිටවන ලෙස හෝ පිටුවහල් කිරීමට මුහුණ දෙන ලෙස පකිස්තාන රජය මීට පෙර දැනුම් දී තිබිණි.
ඒ අතරම, පාකිස්තාන බලධාරීන් ඔවුන් විසින් නිකුත් කරන ලද ඇෆ්ගනිස්ථාන පුරවැසි කාඩ්පත් 800,000 ක් පමණ අවලංගු කරන බව නිවේදනය කළ අතර ඇෆ්ගනිස්ථාන කාඩ්පත් හිමියන්ටද ඉවත් වන ලෙස ඉල්ලා සිටියේය.
වයඹදිග පකිස්ථානයේ ටෝර්කාම් දේශසීමා හරස් මාර්ගයට ප්‍රවාහනය කිරීමට පෙර ඇෆ්ගන් ජාතිකයන් නවාතැන් ගැනීම සඳහා බලධාරීන් නගර කිහිපයක සරණාගත මධ්‍යස්ථාන පිහිටුවා ඇත.
"ඇෆ්ගන් පුරවැසියන් සඳහා, විශේෂයෙන් සින්ද් සහ පන්ජාබ් පළාත්වල නගරවල සහ ගම්වල අසල්වැසි ප්‍රදේශ සහ වීදි පොලිසිය සක්‍රීයව සෝදිසි කිරීමත් සමඟ තත්වය උත්සන්න වී ඇත," පකිස්ථානයේ සරණාගතයින් වෙනුවෙන් පෙනී සිටින නීතිඥ මොනිසා කකාර් පැවසීය.
කකාර් පැවසුවේ මධ්‍යම රාත්‍රියේ වැටලීම් සාමාන්‍ය දෙයක් බවත්, බොහෝ විට පවුල් වෙන්වීමට එය හේතු වන බවයි.
දශක ගනනාවක් තිස්සේ පකිස්ථානය, ඇෆ්ගනිස්තානයේ පවතින යුද්ධ හෝ පීඩාකාරී පාලන තන්ත්‍ර වලින් පලා යන ඇෆ්ගනිස්ථානුවන්ගේ රැකවරණය සඳහා කටයුතු කර තිබේ.
2021 දී තලේබාන් සංවිධානය නැවත බලයට පත්වීමත් සමඟ නවතම සරණාගත රැල්ල ඇති විය.
නිල ඇස්තමේන්තු අනුව 1980 ගණන්වල සිට පකිස්ථානයට පලා ගිය මුළු ඇෆ්ගන් ජාතිකයින් සංඛ්‍යාව මිලියන 4ක් පමණ වේ.
