ඒකාබද්ධ විපක්ෂය මහනුවර සිට ඇරඹි ජන සටන පාද යාත්රාවේ පස් දින සමාප්තිය සනිටුහන් කරමින් කොළඹ ලිප්ටන් වටරවුමේ දී රැස්වීම පැවැත්වීමට කටයුතු කර තිබෙනවා.
ඒ සඳහා ඒකාබද්ධ විපක්ෂයේ තාවකාලික ජංගම වේදිකාව ද ලිප්ටන් වටරවුම අසල ඉදිකර තිබෙනවා.
මේ හේතුවෙන් ලිප්ටන් වටරවුම අවට මාර්ගවල දැඩි රථ වාහන තදබදයක්ද පවතිනවා.
මෙහිදී අදහස් දැක්වූ මහින්ද රාජපක්ෂ මහතා සඳහන් කළේ කුමණ ගැටලු පැණ නැගුනද සටන අත්නොහරින බවයි.
(එම හඬපටය පහතින් දැක්වෙයි)
පාද යාත්රාව ලිප්ටන් වටරවුමට
(Aug 1, 2016 @ 16:54)
ආණ්ඩු විරෝධී ජන සටන පාද යාත්රාව මීට නොබෝ වේලාවකට පෙර ඩාර්ලි පාරේ පිහිටි ශී‍්‍ර ලංකා නිදහස් පක්ෂ මූලස්ථානය පසු කළා. එම ස්ථානයේ කිසිඳු පොලිස් හෝ ආරක්ෂක නිලධාරියෙකු දැක ගැනීමට නොහැකි වූ බවයි නෙත් නිවුස් වාර්තාකරු පැවසුවේ.
ශ්‍රී ලංකා නිදහස් පක්ෂ මූලස්ථානය අභියසින් හිටපු ජනාධිපති මහින්ද රාජපක්ෂ මහතාද පාද යාත්‍රාවත් සමග ගමන් කරමින් සිටිනවා.
නෙත් නිවුස් වාර්තාකරු නිහාල්සිරි ගම්ලත් වැඩි දුරටත් පැවසුවේ පාද යාත්රාව මේ වන විට ලිප්ටන් වටරවුම දෙසට ගමන් කරමින් ඇති බවයි. ලිප්ටන් වටරවුමේදී කුඩා ප්‍රමාණයේ වේදිකාවක් තනා ඇති බවත් සඳහන් කළා.
පාද යාත්රාව හයිඩ්පාර්ක් දෙසට හැරේ
(Aug 1, 2016 @ 16:18)
ඒකාබද්ධ විපක්ෂයේ ජන සටන පාද යාත්රාව කොළඹ හයිඩ්පාර්ක් පිටිය දෙසට ගමන් කරමින් තිබෙනවා.
පාර්ලිමේන්තු මන්ත්‍රී කෙහෙළිය රඹුක්වැල්ල පැවසුවේ හයිඩ්පාර්ක් පිටිය වෙත පැමිණ ඉදිරි වැඩපිළිවෙල පිළිබඳව තීරණයක් ගන්නා බවයි.
කෙසේවෙතත් පාද යාත්රාවේ අවසන් රැළිය පැවැත්වීම සඳහා බොරැල්ල කැම්බල්පිටිය වෙන් කර තිබෙන බවයි මීට සුළු වෙලාවකට පෙර හිටපු ජනපති මහින්ද රාජපක්ෂ මහතා වෙත ලිපියක් භාර දෙමින් පොලිස් නිලධාරීන් කිහිපදෙනෙකු දක්වා තිබුණා.
පාද යාත්‍රාවෙන් කොළඹ තදබදයක්
(Aug 1, 2016 @ 16:01)
ඒකාබද්ධ විපක්ෂයේ ජන සටන පාද යාත්රාව හේතුවෙන් කොළඹ අවට මාර්ගවල මේ වනවිට වාහන තදබදයක් පවතිනවා.
එහි සිටින නෙත් නිවුස් වාර්තාකරු නිහාල්සිරි ගම්ලත් පැවසුවේ පාද යාත්රාව ඔරුගොඩවත්ත හරහා මාළිගාවත්ත, මරදාන දක්වා ගමන් කරමින් සිටින බවයි. මේ හේතුවෙන් අවට මාර්ගද දැඩි තදබදයකට ලක්ව ඇති බවත් පැවසුවා.
ඒකාබද්ධ විපක්ෂය සංවිධාන කරන ජන සටන පාද යාත්රාවේ අවසන් රැළිය පැවැත්වීම සදහා බොරැල්ල කැම්බල්පිටිය වෙන් කර තිබෙනවා.
අද පෙරවරුවේ කිරිබත්ගොඩින් ආරම්භ කෙරුණු ජන සටන පාද යාත්රාව දහවල් 1.30 පමණ වනවිට කොළඹට ඇතුළු වුණා.
