දඹුල්ල මූලික රෝහලේදී දරු ප‍්‍රසූතියෙන් පසු රෝහලෙන් පිටව යාමට සූදානම් වන මව්වරුන්ට උපත් පාලනයකට නතුවන ලෙසට බලපෑම් සිදුකරන බව නෙත් නිවුස් වෙත වාර්තා වුණා.
ඒ සඳහා මව්වරුන්ට බලහත්කාරයෙන් උපත් පාලන උපකරණයක් ශරීරයේ සවි කරන බවටයි තොරතුරු වාර්තා වුණේ.
ඊට අකමැති මව්වරුන්ට නිවෙස් වෙත යා නොදී දින ගණනක් රෝහල් වාට්ටු තුළ අලූත උපන් බිළිදාද සමග බලහත්කාරයෙන් රඳවා ගන්නා බවද සඳහන්.
මේ පිළිබද සොයා බැලීම සදහා නෙත් නිවුස් වාර්තාකරුවන් අද උදෑසන දඹුල්ල මූලික රෝහල වෙත ගියා.
එහිදී මව්වරුන් ප‍්‍රකාශ කර ඇත්තේ අදාළ උපත් පාලන උපකරණය සවි කිරීමට අකමැත්ත පළ කළහොත් දරුවාගේ උප්පැන්න සහතිකය ලියන පෝරමය පවා ලබා නොදෙන බවයි.
දඹුල්ල රෝහලේ සිදුවන බව කියන මෙම සිද්ධියට විරෝධය පළ කරමින් පිරිසක් ලිඛිතව බලධාරීන් වෙත පැමිණිලිද කර තිබෙනවා.
රෝහලේ ගැබිණි වාට්ටුවේ ද්‍රවිඩ ජාතික වෛද්‍යවරියක් මෙලෙස බලපෑම් කරන බවයි නෙත් නිව්ස් වාර්තාකරු සඳහන් කළේ.
නෙත් නිවුස් මේ සම්බන්ධයෙන් දඹුල්ල රෝහලේ වෛද්‍ය අධිකාරී චාල්ස් නුගවෙලගෙන්ද විමසීමක් කළා.
ඔහු කියාසිටියේ මෙවැනි සිද්ධියක් පිළිබද පැමිණිල්ලක් ලැබී ඇති බවත් ඒ පිළිබද වහාම පරීක්‍ෂණයක් සිදුකරන බවත්ය.
රෝගීන්ගේ අකමැත්තෙන් කිසිදු ප‍්‍රතිකාරයක් කිරීමට නොහැකි බවද දඹුල්ල රෝහලේ වෛද්‍ය අධිකාරිවරයා වැඩිදුරටත් කියාසිටියා.
.jpg)
