ශ්‍රී ලංකාවේ වනාන්තර තුළ සිටින අලි පැටවුන් අල්ලා වද හිංසා පමුණුවමින් ඉතා අමානුෂික ලෙස ගෙනවිත් විකිණීමේ ජාවාරම් පිලිබඳව නිරන්තරයෙන් අසන්නට ලැබෙනවා.
බොහෝ විට නිලධාරීන්ගේ සහයෝගය හා අනුදැනුම මත සිදුවන මෙම අලි පැටවූ ජාවරාමේ ආසන්නතම සිදුවීම වාර්තා වන්නේ යාල ජාතික උද්‍යානයේ දෙමළ තොටුපොළ නැමැති ස්ථානයෙන්.
යාල ජාතික උද්‍යානයේ දෙමළ තොටුපොළ නැමති ස්ථානයේ අලි පැටවෙකු ගැටගසා සිටින බවට පසුගිය 07 වනදා කතරගම පොලිසියට ලැබුණු තොරතුරකට අනුව වනජීවී නිලධාරින් සමග එම ස්ථානය පරික්ෂා කිරීමට පොලිසිය පිටත්ව ගියත් අලි පැටවෙකු නොසිටි නිසා නිලධාරීන් නැවත පැමිණ තිබෙනවා.
මේ අතර කතරගම, සිතුල්පව්ව මාර්ගයේ මැණික්පුරගම ප්‍රදේශයේ නිවසකට මාස තුනක් පමණ වයස අලි පැටවෙකු පැමිණ ඇති බවට නිවෙස් හිමියාගෙන් කතරගම වනජීවී නිලධාරීන් හට ලැබුණු තොරතුරකට අනුව වනජීවී නිලධාරීන් හා පොලිසිය එහි ගොස් නිවසේ ගැටගසා සිටි අලි පැටවා උඩවලව ඇත් අතුරු සෙවනේ පශු වෛද්‍යවරුන්ගේද අධික්ෂණය යටතේ උඩවලව අතුරු සෙවනට ගෙනවිත් ඇති බවද වාර්තා වනවා.
මෙම අලි පැටවාගේ සිද්ධිය පිටුපස සැක සිතීමට කරුණු ගණනාවක් ඇති අතර අලිපැටවා සොයාගන්න ගිය අවස්ථාවේ පැටවාගේ පාදයක තිබූ තුවාල හේතුවෙන් නිසැකවම ගැටගසා තුබූ බවට සාක්ෂි සපයා ඇති අතර අලි පැටවා සොයා ගන්න විට බඩයාමේ රෝගයකින් පෙළමින් සිට ඇති අතර ඉන් හෙළි වන්නේ අලි පැටවා රඳවාගෙන කිරි පිටි දී ඇති බවයි.
මේ සම්බන්ධයෙන් සොයා බැලීමට වනජීවී අධ්‍යක්ෂ ජනරාල් එම්.ජී.සී. සූරියබණ්ඩාරගේ උපදෙස් මත බස්නාහිර පළාත් භාර වනජීවී සහකාර අධ්‍යක්ෂක ඩබ්ලිවූ .ඒ.ඩි.ඒ ,ඉන්ද්‍රජිත්ගේ ප්‍රධානත්වයෙන් විශේෂ කණ්ඩායමක් පත් කර ඇති අතර කතරගම පොලිසිය මගින්ද මෙම සිද්ධිය සම්බන්ධයෙන් පරීක්ෂණයක් ආරම්භ කර ඇති බවයි අප වර්තාකරු පවසන්නේ.
