දෙමළ රූපවාහිනී නාලිකාවක් සමග සම්මුඛ සාකච්ඡාවකට එක් වෙමින් සෞඛ්‍ය, පෝෂණ හා දේශීය වෛද්‍ය අමාත්‍ය රාජිත සේනාරත්න පසුගියදා අම්පාර ප්‍රදේශයේ ඇති වූ වඳ පෙති සම්බන්ධ සිද්ධිය පිළිබඳ අදහස් පළ කර තිබෙනවා.
එම සාකච්ඡාවට එක්වෙමින් අදහස් දැක් වූ සෞඛ්‍ය අමාත්‍යවරයා සඳහන් කළේ,
"වාර්ගිකත්වය පදනම් කර ගනිමින් සිදු කරන ප්‍රචණ්ඩ ක්‍රියාවලට සම්බන්ධවූවන්ට දැනට පවතින අණ පනත්වලට අනුව අත්අඩංගුවට ගෙන නීතිය ක්‍රියාත්මක කළ යුතුයි. වත්මන් රජය ජාතිවාදයට සහ ආගම්වාදයට විරුද්ධයි. රජය ජාතිවාය හා ආගම්වාදය පතුරන අයට විරුද්ධව ක්‍රියාකිරීමට නීති රීති ඉදිරිපත් කළා. එම නීති ක්‍රියාත්මක කළ යුතුයි. ලබාදී ඇති සාමය භුක්තිවිඳීමට නොදන්න අයට දඩුවම් ලබා දිය යුතුයි.
අම්පාර නගරයේ සිදු වූ සිද්ධිය සම්බන්ධනේ දැඩි ක්‍රියාමාර්ග ගත යුතුයි. පොලීසිය මන්දගාමිව කටයුතු කිරිම පිළිබඳව ප්‍රශ්න තිබෙනවා. මෙය අමූලික බොරු සිද්ධියක්. වඳපෙති කියා ඖෂධයක් ශ්‍රී ලංකාවේ පවතින වෛද්‍ය ක්ෂේත්‍රයේ නැහැ. ශ්‍රී ලංකාවේ සාක්ෂරතාවය වැඩි දියුණු වී තිබුණ ද මෙවැනි කරුණු පිළිබඳව ඇත්තේ මන්ද බුද්ධික බවක්. සුළු සිද්ධියක් මුල්කර ගෙන රටවල් ගිනි තැබීමට හදනවා. මේ සිද්ධිය සම්බන්ධයෙන් දැඩි ක්‍රියාමාර්ග ගන්නා ලෙස මම අග්‍රාමාත්‍යවරයාගෙන් ඉල්ලා සිටියා.
අග්‍රාමාත්‍යවරයා මට පොරොන්දු වුනා අපක්ෂපාති පරීක්ෂණයක් පවත්වනවා කියලා. අම්පාර සිද්ධිය අදිසි හස්තයක් මත ක්‍රියාත්මක වී ඇත් ද පිළිබදව පරීක්ෂණ පවත්වනවා. පසුගිය රජයේ ප්‍රධානියෙකුගේ චෝදනා ලැබූ පුද්ගලයෙකු සිද්ධිය සිදු වූ දින කිහිපය පුරා අම්පාර ප්‍රදේශයේ පොලිස් නිලධාරීන් සමග සුහඳ හමු පැවැත්වීමේ සිද්ධි කිහිපයක තොරතුරු ද වාර්තා වී තිබෙනවා. වඳ පෙත්ත මුවාවෙන් එම පුද්ගලයා ජාතිවාදය පැතිරවීමේ උත්සාහයක් ක්‍රියාත්මක කර ඇත්දැයි පරීක්ෂණ පවත්වනවා.
කෙසේ වෙතත් ලබා දී ඇති නිදහස අයුතු ලෙස ප්‍රයෝජනයට ගැනීමට ඇතැම් අය පෙළඹී සිටිනවා. බණ්ඩාරනායක මහතා ද නිදහස ලබාදුන් පසු ඇතැම් අය කථානායක පුටුවෙත් වාඩිවෙන්න උත්සාහ කළා. ලැබූ නිදහසින් බණ්ඩාරනායක මහතා ද ඝාතනය කෙරුනා." යනුවෙනි.
