ෆේස්බුක්, වට්ස්ඇප් ඇතුළු සමාජ ජාල මාධ්‍ය වෙත පිවිසීමට පනවා තිබූ අවහිරතා සම්බන්ධයෙන් විශේෂ සාකච්ඡාවක් අද (12) පැවැත්වීමට නියමිතයි.
එහිදී මෙම අවහිරතා ඉවත් කරන්නේද? නැතහොත් තවදුරටත් පවත්වාගෙන යන්නේද සම්බන්ධයෙන් සාකච්ඡා කෙරෙනු ඇති.
ෆේස්බුක්, වයිබර්, වට්ස්ඇප් ඇතුළු සමාජජාලා වෙබ් අඩවිවලට පිවිසිම අත්හිටුවීමට විදුලි සංදේශ නියාමන කොමිෂන් සභාව තීරණය කළේ ඉකුත් 7 වැනිදා සිටයි.
ඒ, මහනුවර ප‍්‍රදේශයේ පැවති තත්ත්වය සැළකිල්ලට ගනිමින්. ෆේස්බුක් ඇතුළු සමාජ ජාල වෙබ් අඩවි ඔස්සේ අසත්‍ය තොරතුරු පතුරවාහැරීම වැලැක්වීම එහි අරමුණ වුණා. කෙසේවෙතත් ආණ්ඩුව පසුව ප‍්‍රකාශ කළේ මෙම තහනම පැය 72 ක කාලයක් සඳහා පමණක් පැනවූ බවයි. එහෙත් එම කාලය දැන් අවසන් වී තිබෙනවා.
කෙසේවෙතත් සමාජජාල මාධ්‍ය තහනම ඉවත් කිරීමට රජය කටයුතු කරනු ඇත්තේ රට තුළ ජාතිවාදී, ආගම්වාදී හා අසත්‍ය ප‍්‍රචාර පතුරුවා හැරීම නැවතී ඇති බවට ආරක්‍ෂක අංශ රජයට වාර්තා කිරීමෙන් පසුව බවයි වාර්තා වන්නේ. එමෙන්ම මේ වනවිට පනවා ඇති තහනම කඩිනමින් ඉවත් කිරීම සම්බන්ධයෙන් මේ වනතෙක් ආණ්ඩුව කිසිදු තීරණයක් ගෙන නොමැති බවටද වාර්තා වුණා.
මේ අතර සමාජජාල මාධ්‍ය මෙන්ම මෙරට මාධ්‍ය සඳහා ද නීති පද්ධතියක් හදුන්වා දිය යුතු බව ස්වදේශ කටයුතු අමාත්‍ය වජිර අබේවර්ධන පවසනවා. ඒ සදහා ජාත්‍යන්තර රටවල ආදර්ශය ගත හැකි බවයි ප‍්‍රකාශ කෙරුණේ.
මේ අතර අන්තර්ජාලය භාවිත කරමින් ජාතීන් අතර අසමගිය ඇතිවන පරිදි කටයුතු කිරීම සම්බන්ධයෙන් අත්අඩංගුවට ගත් පාසල් සිසුන් දෙදෙනා ලබන 22 වැනිදා තෙක් මාකොළ තරුණ රැදවුම් මධ්‍යස්ථානයේ රැඳවීමට අධිකරණය ඊයේ (11) නියෝග කළා.
