රුපියල් 2,80,00,000 (දෙකෝටි අසූ ලක්ෂයක් ) ක් වටිනා විදේශ මුදල් තොගයක් නීතිවිරෝධී ලෙස සිංගප්පූරුව බලා රැගෙන යෑමට තැත් කළ ශ්‍රී ලාංකික ගුවන් මගියෙකු 9/03 දින දහවල් කටුනායක ගුවන් තොටුපොළේ දී රේගු නිලධාරීන් විසින් අත් අඩංගුවට ගෙන ඇති බව වැඩබලන රේගු මාධ්‍ය ප්‍රකාශක විපුල මිනුවන්පිටිය සදහන් කර සිටියා.
25 හැවිරිදි මීගමුව ප්‍රදේශයේ පදිංචිකරුවෙක් වන මෙම පුද්ගලයා අද (03) උදැසන 11.10 ට පමණ සිංගප්පූරුව බලා පිටත්ව යන ශ්‍රී ලන්කන් ගුවන් සේවයේ යූ.එල්.- 308 දරන ගුවන් යානයයෙන් කටුනායක ගුවන් තොටුපොලේ සිට සිංගප්පුරුව බලා යාමට සුදානම්ව පැමිණ තිබුනා.
ගුවන් තොටුපොල ආරක්ෂක නිලධාරීන් විසින් සිදු කරන ලද ස්කෑන් පරීක්ෂණයේ දී මෙම පුද්ගලයා විසින් රැගෙන ආ ගමන් මල්ලේ ව්‍යාජ පතුලක මෙම විදේශ මුදල් තොගය සගවා ගෙන ඇති බව අනාවරණය වීමෙන් පසු එම පුද්ගලයා සහ ගමන් මල්ල ගුවන් තොටුපොළ රේගු නිලධාරීන් වෙත භාර දීමට ආරක්ෂක නිලධාරින් විසින් පියවර ගෙන තිබුනා.
රේගු නිලධාරීන් විසින් මොහුගේ ගමන් මල්ලේ ව්‍යාජ පතුලක සගවා ගෙන තිබූ රුපියල් දෙකෝටි අසු ලක්ෂයක් වටිනා යූරෝ, කටාර් රියාල්, ස්විස් ෆ්‍රෑන්ක්, ඩෙන්මාර්ක් ක්‍රෝනර් සහ සෞදි රියාල් තොගය සොයාගෙන අත් අඩංගුවට ගෙන තිබුනු අතර සිද්ධිය පිළිබඳව වැඩිදුර විමර්ශන කටයුතු මේ වන විටත් සිදුකරමින් පවතී.
