බෞද්ධ දහම් පාසල්වල 01 වන ශ්‍රේණියේ සිට 05 වන ශ්‍රේණිය සඳහා අධ්‍යයන කටයුතු අද (23) සිට ආරම්භ වනවා. බෞද්ධ කටයුතු කොමසාරිස් දෙපාර්තමේන්තුව සදහන් කළේ 06 වන ශ්‍රේණියේ සිට 13 වන ශ්‍රේණිය සදහා බෞද්ධ දහම්පාසල්වල අධ්‍යයන කටයුතු ඉකුත් 16 වනදා සිට ආරම්භ කෙරුණූ බවයි.
කොරෝනා වසංගතය හේතුවෙන් බෞද්ධ දහම් පාසල්වල අධ්‍යයන කටයුතු ද තාවකාලිකව අත්හිටුවීමට තීරණය කෙරුණා.
කෙසේවෙතත් අදියර කිහිපයක් යටතේ පාසල් අධ්‍යයන කටයුතු ආරම්භ කර ඇති බැවින් බෞද්ධ දහම් පාසල්වල අධ්‍යයන කටයුතු ආරම්භ කිරීමට ද සෞඛ්‍ය බලධාරීන් අවසර ලබාදී තිබෙනවා.
මේ අතර පාසල්වල අධ්‍යයන කටයුතු සාමාන්‍ය පරිදි යළි ආරම්භ කිරීම සම්බන්ධයෙන් අධ්‍යාපන අමාත්‍යංශයේ අවධානය යොමුව තිබෙනවා. ඒ අනුව සැප්තැම්බර් මස 01 වැනිදායින් පසු පාසල්වල අධ්‍යයන කටයුතු සාමාන්‍ය පරිදි සිදු කිරීමටයි එම අමාත්‍යංශයේ අවධානය යොමුව ඇත්තේ. මේ සම්බන්ධයෙන් සෞඛ්‍ය බලධාරීන්ගේ උපදෙස් අපේක්ෂා කරමින් ලිඛිත ඉල්ලීමක් සිදුකර ඇති බව ද අධ්‍යාපන අමාත්‍යංශය සදහන් කළා.
