කැබිනට් මණ්ලයේදී තින්දු තීරණ ගැනීමෙන් පසු එම රැස්වීමට සහභාගී වූ ආණ්ඩුවේ හවුල්කාර පක්ෂවල අමාත්‍යවරුන් ඊට එරෙහිව මාධ්‍ය වෙත නිවේදන නිකුත් කිරීම අනුමත කළ නොහැකි බව ශ්‍රී ලංකා පොදුජන පෙරමුණ පවසනවා.
එහි මහ ලේකම් නීතීඥ සාගර කාරියවසම් කොළඹ අද පැවැති මාධ්‍ය හමුවකට එක්වෙමින් සඳහන් කළේ ජනාධිපතිවරයා මේ සම්බන්ධයෙන් සොයා බැලීමක් සිදුකළ යුතු බවයි.
අවම වශයෙන් සති 03 කට හෝ රට වසා දමන ලෙස, ආණ්ඩුවේ හවුල්කාර පක්ෂ 10ක් ජනාධිපති ගෝඨාභය රාජපක්ෂ මහතාගෙන් ඉකුත් දා ලිඛිත ඉල්ලීමක් කර තිබුණා. හවුල්කාර පක්ෂ යොමු කළ එම ලිපිය සම්බන්ධයෙන් අදහස් පළ කරමින් ශ්‍රී ලංකා පොදුජන පෙරමුණේ මහලේකම් නීතීඥ සාගර කාරියවසම් මෙම අදහස් පළ කළා.
ශ්‍රී ලංකා පොදුජන පෙරමුණ සහ ආණ්ඩුවේ හවුල්කාර පක්ෂ අතර දිගින් දිගටම ඇතිවන මත ගැටුම් සම්බන්ධයෙන් මාධ්‍යවේදීන් මෙහිදී ප්‍රශ්න කළා.
