ඒකාබද්ධ විපක්‍ෂය නියෝජනය කරන රත්නපුර දිස්ත‍්‍රික්කයේ දේශපාලනඥයන් දෙදෙනෙකු අතර මතගැටුමක් නිර්මාණය වී තිබෙනවා.
දේශපාලන ආරංචි පැවසුවේ මෙම මතගැටුමට සම්බන්ධ එක් දේශපාලනඥයෙකු අනෙක් දේශපාලනඥයාට ඉකුත්දා දුරකතනය ඔස්සේ බැණ වැදීමක් ද කර ඇති බවයි. මහින්ද රාජපක්‍ෂ මහතා 2004 වසරේදී අගමැති ධුරයට නම් කිරීමේදී මතු වූ අදහසක් සහ 2016 වසරේ අයවැය ඡන්ද විමසීමේදී සිදුවූ කරුණු මූලික කර ගනිමින් බැණ වැදීම සිදුවී ඇතැයි ද දේශපාලන ආරංචි කියා සිටියා.
මතගැටුමට සම්බන්ධ එක් දේශපාලඥයෙකු කලක් යහපාලන ආණ්ඩුවටද සම්බන්ධ වී සිටි අයෙක්. ඉකුත් දා රත්නපුරයේ පැවති ඒකාබද්ධ විපක්ෂයේ ජනරැළිය ද මෙම දේශපාලනඥයාගේ මූලිකත්වයෙන් සංවිධාන කෙරුණා.
මතගැටුමට සම්බන්ධ වී සිටින අනෙක් දේශපාලනඥයා රත්නපුරයේ පැවති ජනරැළියට සහභාගි වී නැහැ. කෙසේවෙතත් රැළියේ පූර්ව සූදානම් කිරීමේ කටයුතුවලට එම දේශපාලනඥයා සිය දායකත්වය ලබාදී තිබෙනවා.
