මොරගහකන්ද ජලාශයේ ජලය උතුරු පළාතට ලබාදෙන විට එම ව්‍යාපෘතියේ යම් අයිතියක් උතුරු පළාත් සභාවටද ලබාදිය යුතු බවට ප‍්‍රධාන අමාත්‍ය සී වී විග්නේෂ්වරන් ඉල්ලීමක් කර තිබෙනවා.
ඒ, ජපානයේ ජයිකා ආයතනයේ නිලධාරීන් සමග පැවති සාකච්ඡාවකදීයි.
මොරගහකන්ද ජලාශයෙන් උතුරු පළාතට ලැබෙන ප‍්‍රතිලාභ පිළිබඳ එම පළාතේ දේශපාලන අධිකාරිය දැනුවත් කිරීම සදහා යාපනයේ පැවති සාකච්ඡාවකදී මහ ඇමතිවරයා මෙම ඉල්ලීම කර තිබෙනවා.
මෙම අවස්ථාවට උතුරු පළාත නියෝජනය කරන පාර්ලිමේන්තු මන්තී‍්‍රවරුන් සහ පළාත් සභා මන්තී‍්‍රවරුන් පිරිසක් එක්ව ඇති බවයි නෙත් නිවුස් වාර්තාකරු පැවසුවේ.
උතුරු පළාත් සභාවේ දෙමළ ජාතික සන්ධාන මන්තී‍්‍ර එම් කේ සිවාජිලිංගම් කියාසිටියේ මධ්‍යම රජය සහ උතුරු පළාත් සභාව මේ සම්බන්ධයෙන් ගිවිසුමකට අත්සන් කලයුතු යැයි අදාළ යෝජනාව ඉදිරිපත් කරමින් පළාත් ප‍්‍රධාන අමාත්‍යවරයා අවධාරණය කළ බවයි.
මධ්‍යම රජයට පමණක් මොරගහකන්ද ජලාශයේ ජලය උතුරට හැරවීමේ තනි අයිතිය ලැබුණහොත් දකුණේ ජනතාව උතුරේ පදිංචිකරමින් නව ජනපද ඇති කිරීමට රජය කටයුතු කළ හැකි බැවින් ප‍්‍රධාන අමාත්‍යවරයා මෙම යෝජනාව ඉදිරිපත් කළ බවද ඔහු ප‍්‍රකාශ කළා.
