ව්‍යාපාරික සුරේන්ද්‍ර වසන්ත පෙරේරා නොහොත් ක්ලබ් වසන්ත ඝාතන සිද්ධිය සම්බන්ධයෙන් අත්අඩංගුවට ගත් සැකකරුවන් 07 දෙනා ලබන 22වනදා දක්වා රක්ෂිත බන්ධනාගාරගත කෙරුණා.
ඒ, ඔවුන් කඩුවෙල මහේස්ත්‍රාත් අධිකරණයට ඉදිරිපත් කිරීමෙන් අනතුරුවයි.
ඒ අතරට ටැටූ මධ්‍යස්ථානයේ හිමිකරු වන දුලාන් සන්ජුල නමැත්තාද අයත්. සෙසු සැකකරුවන් අතර වෙඩි තැබීමට පැමිණි කාර් රථය අම්බලන්ගොඩ ප්‍රදේශයේ සිට අතුරුගිරිය ප්‍රදේශයට රැගෙන එන ලද සැකකරුවන් දෙදෙනෙකු වන බව ද වාර්තා වනවා.
මේ අතර, ව්‍යාපාරික සුරේන්ද්‍ර වසන්ත පෙරේරා නොහොත් ක්ලබ් වසන්ත ඝාතනයට ලක්වූ ටැටූ මධ්‍යස්ථානයේ හිමිකරු දුලාන් සන්ජුල අදාළ සිද්ධිය පිළිබඳ පොලීසිය හමුවේ අද පාපොච්චාරණයක් සිදු කළා.
එහිදී ඔහු පවසා තිබුණේ තම ව්‍යාපාරය ආරම්භ කිරීමට ලොකු පැටී නමැත්තා රුපියල් ලක්ෂ 16ක මුදලක් ලබා දුන්නද ක්ලබ් වසන්ත ඝාතන තැතක් පිළිබඳ තමා නොදැන සිටි බවයි.
ව්‍යාපාරිකයකු වූ ක්ලබ් වසන්ත, ඉකුත් සඳුදා අතුරුගිරියේ පිහිටි ටැටූ මධ්‍යස්ථානයේ සිදුවූ වෙඩි තැබීමකින් ජීවිතක්ෂයට පත්වුණා.
එම අවස්ථාවේ සිටි ප්‍රසිද්ධ ගායන ශිල්පිනී කේ. සුජීවාගේ සැමියා වන නයන වාසුල නමැත්තාද ජීවිතක්ෂයට පත් වූ අතර කේ.සුජීවා, ක්ලබ් වසන්තගේ බිරිය, තවත් කාන්තාවක් හා පිරිමි පුද්ගලයෙකු ද තුවාල ලැබුවා.
මේ අතර වෙඩි ප්‍රහාරයෙන් තුවාල ලැබූ ක්ලබ් වසන්තගේ බිරිඳගේ තත්ත්වය බරපතල බවටද වාර්තා පළ වනවා.
