පළාත් පාලන ඡන්ද විමසීම සඳහා ඉදිරිපත් කෙරුණු නාම යෝජනා ප්‍රතික්ෂේප කිරීමට එරෙහිව ගොනුකර තිබෙන පෙත්සම් පිළිබඳ නියෝගය හෙට දින ප්‍රකාශයට පත් කරන බව අභියාචනාධිකරණය අද නියෝග කළා.
ඒ අනුව උප්පැන්න සහතිකවල සහතික පිටපත් ඉදිරිපත් කිරීම, දිවුරුම සම්බන්ධ ගැටළු සහ උප්පැන්න සහතික වල ඡායා පිටපත් ඉදිරිපත් කිරීම යන කරුණු මත ප්‍රතික්ෂේප කෙරුණු නාම යෝජනාවලට අදාළව ගොනුකරන ලද පෙත්සම් පිළිබඳ නියෝගය හෙට දින ප්‍රකාශයට පත් කරන බවයි අභියාචනාධිකරණය නියම කළේ.
ඊට අමතරව නාම යෝජනා ප්‍රතික්ෂේප කිරීම සම්බන්ධයෙන් මේ වනවිට අධිකරණය හමුවේ විමසීමට භාජනය වී තිබෙන පෙත්සම් වලට අදාල පලාත් පාලන ආයතන සම්බන්ධයෙන් හෙට දින තෙක් මැතිවරණය පැවැත්වීමට අදාළ ඉදිරි පියවර ගැනීමෙන් වළකින ලෙස අභියාචනාධිකරණය විසින් අද අදාළ තේරීම් භාර නිලධාරීන්ට නියම කළා.
උප්පැන්න සහතික වල සහතික පිටපත් ඉදිරිපත් කිරීම සහ අනෙකුත් තාක්ෂණික කාරණා මත ප්‍රතික්ෂේප කරන ලද නාමයෝජනා යළි භාර ගැනීමට ඇති හැකියාව පිළිබඳව තේරීම් භාර නිලධාරීන්ගෙන් උපදෙස් ලබාගෙන අද දින අධිකරණයට දැනුම් දෙන ලෙසයි අභියාචනාධිකරණ විනිසුරු මඩුල්ල විසින් ඊයේ නීතිපතිවරයාට නියම කළේ.
එම පෙත්සම් අද පෙරවරුවේ අභියාචනාධිකරණයේ වැඩ බලන සභාපති විනිසුරු මොහොමඩ් ලෆාර් තාහීර් සහ කේ.පී. ප්‍රනාන්දු යන විනිසුරු මඩුල්ල ඉදිරියේ කැඳවූ අවස්ථාවේදී වග උත්තරකාර තේරීම් භාර නිලධාරීන් වෙනුවෙන් පෙනී සිටි ජේෂ්ඨ රජයේ නීතිඥවරයා සඳහන් කළේ අදාළ නාම යෝජනා පත්‍ර යළි භාර ගැනීම ගැටලු සහගත බවයි.
ඒ අනුව අදාළ නාමයෝජනා ප්‍රතික්ෂේප කිරීමට එරෙහිව ගොනුකර තිබෙන පෙත්සම් සම්බන්ධයෙන් විරෝධතා ගොනු කිරීම සඳහා කාලය ලබා දෙන ලෙසත් රජයේ නීතිඥවරයා අධිකරණයෙන් ඉල්ලා සිටියා.
එම අවස්ථාවේදී අධිකරණය හමුවේ පෙනී සිටි තේරීම් භාර නිලධාරියකු ඇමතු අභියාචනාධිකරණයේ වැඩ බලන සභාපති විනිසුරු මොහොමඩ් ලෆාර් තාහීර් මහතා “ඔබලා නාමයෝජනා භාර ගන්නේ ඒවා ප්‍රතික්ෂේප කිරීමේ අරමුණින් දැයි” ප්‍රශ්න කළා.
වැඩිදුරටත් තේරීම් භාර නිලධාරියා ඇමතු සභාපති විනිසුරුවරයා “බොහොමයක් නාම යෝජනා පත්‍ර ප්‍රතික්ෂේප කරල තිබෙන්නේ තාක්ෂණික හේතුන් මත. නිලධාරීන්ගෙන් යුක්තිය නොලැබෙන නිසයි පෙත්සම් සිය ගානක් අධිකරණයට ඇවිත් තිබෙන්නේ. ඔය තාක්ෂණික කාරණා කියන දේවල් කපා දැමිය යුතුයි. එහෙම කළා කියලා කාටවත් පාඩුවක් වෙන්නේ නෑ.
අපි මිනිස්සුන්ගේ අයිතිවාසිකම් ආරක්ෂා කළ යුතුයි.
ඒ වගේ දේවල් නිසා මිනිසුන්ට යුක්තිය ඉටුවන්නේ නෑ. උදාහරණයක් හැටියට යම්කිසි නීතිඥවරයෙක් මං ඉදිරියේ පෙනී ඉන්නවා කිව්වොත් මා විශ්වාස කරනවා පෙරකලාසියක් ඉදිරිපත් කරලයි ඔහු පෙනී සිටින්නේ කියලා.
ඒ අවස්ථාවේදී මම ඒ නීතිඥවරයාගෙන් අහන්නේ නෑ ඔබට පෙනී සිටින්න පෙරකලාසියක් තියෙනවාද? කියලා.
මේවා සරල කරුණු. මේවා පිළිබඳව නිලධාරීන් දැනුවත් විය යුතුයි. එම නිසා මෙවැනි නීතිමය තත්ත්වයන් ගැන ලංකාවේ සියලූම නිලධාරින් ඒකරාශිකොට සම්මන්ත්‍රණයක් පැවැත්වීම සුදුසුයි කියලා මම හිතනවා. ” යනුවෙන් සඳහන් කළා.
එමෙන්ම සියලු නිලධාරීන් සද්භාවයකින් යුතුව කටයුතු කළ යුතු බවත් සභාපති විනිසුරුවරයා අවධාරණය කළා.
ඉන් අනතුරුව පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥවරුන් වන ෆයිසර් මුස්තාපා, අලි සබ්රි, මනෝහර ද සිල්වා ඇතුළු නීතිඥවරුන් අධිකරණයෙන් ඉල්ලා සිටියේ පෙත්සම් විභාගයට ගැනීමට කටයුතු කරන්නේ නම් අදාළ නාමයෝජනා ප්‍රතික්ෂේප කරමින් තේරීම් බාර නිලධාරින් විසින් දී තිබෙන තීරණය අතුරු තහනම් නියෝගයක් නිකුත් කළ යුතු බවයි.
ඒ අනුව අදාළ කරුණු සම්බන්ධයෙන් වග උත්තරකරුවන්ගේ ස්ථාවරය විමසා දැනුම් දෙන ලෙස නියම කළ අභියාචනාධිකරණ විනිසුරු මඩුල්ල ඒ අනුව අදාළ පෙත්සම් අද දහවල් 2.00 දක්වා කල් තැබුවා.
ඉන් අනතුරුව අදාල පෙත්සම් කැඳවූ අවස්ථාවේදී අධිකරණය හමුවේ කරුණු දැක්වූ ජ්‍යෙෂ්ඨ රජයේ නීතිඥවරයා මෙම කරුණු සම්බන්ධයෙන් වග උත්තරකරුවන් අධිකරණය විසින් නිකුත් කරනු ලබන නියෝග වලට අනුව කටයුතු කිරීමට සූදානම් බව සඳහන් කළා.
ඒ අනුව අදාළ නාම යෝජනා ප්‍රතික්ෂේප කිරීමට හේතු වී තිබෙන උප්පැන්න සහතික වල සහතික පිටපත් ඉදිරිපත් කිරීමේදී ඇතිවූ ගැටලු, උප්පැන්න සහතික වල ඡායා පිටපත් ඉදිරිපත් කිරීම, ආණ්ඩුක්‍රම ව්‍යවස්ථාවේ 07 වන ව්‍යවස්ථාව යටතේ විධිමත් දිවුරුමක් ලබාදී නොතිබීම සහ සාම විනිසුරු සහතික කිරීම් පිළිබඳ ගැටලු යනාදී වශයෙන් කාණ්ඩ වලට බෙදා අදාළ පෙත්සම් පිළිබඳ කරුණු සලකා බැලීමට අධිකරණය තීරණය කළා.
ඒ අනුව අදාල කාණ්ඩ තුනක් සම්බන්ධයෙන් කරුණු ඉදිරිපත් කිරීම් අවසන් වීමෙන් පසුව අභියාචනාධිකරණ විනිසුරු මඩුල්ල එම පෙත්සම් සම්බන්ධ නියෝගය හෙට දින ප්‍රකාශයට පත් කරන බවයි නිවේදනය කළේ.
මේ අනුව සෙසු තාක්ෂණික කාරණා මත ප්‍රතික්ෂේප කෙරුණු නාම යෝජනා සම්බන්ධයෙන් ඉදිරිපත් කර තිබෙන පෙත්සම් හෙට දින අධිකරණය හමුවේ සලකා බලන බවත් විනිසුරු මඩුල්ල සඳහන් කර සිටියා.
සිය නාමයෝජනාපත්‍ර ප්‍රතික්ෂේප කිරීමට එරෙහිව පොදුජන එක්සත් පෙරමුණ, ශ්‍රී ලංකා පොදුජන පෙරමුණ, සමගි ජන බලවේගය, ජාතික ජන බලවේගය, ස්වාධීන කණ්ඩායම් විසින් පෙත්සම් 30 කට ආසන්න ප්‍රමාණයක් ඉදිරිපත් කර තිබෙනවා.
පෙත්සම්කරුවන් පවසන්නේ ඡන්ද විමසීම සඳහා තමන් භාරදුන් නාමයෝජනා පත්‍ර ප්‍රතික්ෂේප කිරීමට තේරීම් භාර නිලධාරීන් ගත් තීරණය නීතියට පටහැනි බවයි.
ඒ අනුව එම ප්‍රතික්ෂේප කිරීම නීති විරෝධී බවට තීන්දු කොට ඒවා යළි භාරගන්නා ලෙස නියෝගයක් නිකුත් කරන ලෙසත් පෙත්සම්කරුවන් අභියාචනාධිකරණයෙන් ඉල්ලා සිටිනවා.
