දුම්රිය ස්ථානාධිපතිවරුන් හා දුම්රිය පාලකවරුන් ආරම්භ කළ වැඩ වර්ජනය තවදුරටත් ක්‍රියාත්මක වනවා.
මේ හේතුවෙන් රාජකාරි සඳහා මෙන්ම දුම්රියෙන් සිය ගමනාගමන අවශ්‍යතා සපුරා ගන්නා මගීන් අද උදෑසනත් දැඩි අපහසුතාවකට පත් වුණා.
සාමාන්‍යයෙන් සතියේ දිනකට ක්‍රියාත්මක දුම්රිය ගමන් වාර ගණන 320 ක් පමණ වනවා.
ඊයේ පෙරවරුවේ දුම්රිය ගමන් වාර 35ක් ක්‍රියාත්මක වූ අතර පස්වරුවේ ක්‍රියාත්මක වුණේ දුම්රිය ගමන් වාර 30ක් පමණයි.
ඒ අනුව දෛනිකව ධාවනය විය යුතු දුම්රිය ගමන්වාරවලින් සියයට 80ක් පමණ ඊයේ ධාවනය වූයේ නැහැ.
එවන් පසුබිමක වර්ජනය ක්‍රියාත්මක වුවද දුම්රිය ගමන් වාර කිහිපයක් අද උදෑසන ධාවනය කිරීමට පියවර ගන තිබුණද එම දුම්රියන්හි දැකගත හැකි වූයේ අධික මගී තදබදයක්.
දුම්රිය බලධාරීන් පැවසුවේ කාර්යාල ඇතුළු දුම්රිය ගමන් වාර 20ක් පමණ අද උදෑසන ධාවනය කළ බවයි.
දුම්රිය වර්ජනය හේතුවෙන් පීඩාවට පත් වන මගීන් වෙනුවෙන් ලංගම බස් රථ යොදවා තිබෙනුද දැකගත හැකි වුණා.
එහෙත් ඒවායේ දක්නට ලැබුණේ මගී තදබදයක්. දුම්රිය වර්ජනය හේතුවෙන් ඊයේ උදෑසන, ඊයේ සවස මෙන්ම අද උදෑසනද පීඩාවට පත් මගීන් පිරිසක් නෙත් නිවුස් අපටද මුණ ගැසුණා.
පෙරේදා පස්වරුවේ සිට ආරම්භ කළ මෙම වෘත්තීය සමිති ක්‍රියාමාර්ගය ඊයේ මධ්‍යම රාත්‍රී 12න් අවසන් කිරීමටයි මීට පෙර තීරණය කර තිබුණේ.
එහෙත් බලධාරීන් තම ගැටලුවලට විසඳුම් දෙනවා වෙනුවට මර්දනය ක්‍රියාත්මක කිරීමේ උත්සහය හේතුවෙන් වර්ජනය අඛණ්ඩව ක්‍රියාත්මක කරන බව දුම්රිය ස්ථානාධිපතිවරන්ගේ සංගමය පැවසුවා.
එහෙත් වැඩබලන දුම්රිය සාමාන්‍යාධිකාරී එස් එස් මුදලිගේ පැවසුවේ වර්ජනය නතර කර යළි සේවයට වාර්තා කරන තුරු වෘත්තීය සමිති සමග කිසිදු සාකච්ඡාවක් සිදු නොකරන බවයි.
කෙසේවෙතත් දුම්රිය ස්ථානාධිපතිවරුන්ගේ සංගමයේ ප්‍රධාන ලේකම් සංජය ජයසුන්දර මීට නොබෝ වේලාවකට පෙර නෙත් නිවුස් වෙත පැවසුවේ බලධාරීන් කුමක් ප්‍රකාශ කළද විසඳුම් ලැබෙන තුරු වර්ජනය කිසිසේත් අත්නොහරින බවයි.
දුම්රිය වර්ජනය සම්බන්ධයෙන් පාර්ලිමේන්තුවේදීද අද අදහස් පළ වුණා.
ආණ්ඩු පක්ෂයේ ප්‍රධාන සංවිධායක අමාත්‍ය ප්‍රසන්න රණතුංග පැවසුවේ අදාළ වෘත්තීය සමිති නායකයින්ට එරෙහිව විෂය භාර අමාත්‍යවරුන් වහා පියවර ගත යුතු බවයි.
දුම්රිය දෙපාර්තමේන්තුවේ සිටින සමස්ත දුම්රිය ස්ථානාධිපතිවරුන්ගේ සංඛ්‍යාව 922ක්. ඔවුන් සියලු දෙනාම මේ වන විට වර්ජනයට එක්ව සිටිනවා.
දුම්රිය සාමාන්‍යාධිකාරිවරයාගේ නියෝගය පරිදි, ඊයේ දහවල් 12ට පෙර ඔවුන් සේවයට වාර්තා නොකළ බැවින් මෙම සියලුම ස්ථානාධිපතිවරුන් සේවය හැර ගියා සේ සලකනු ලැබූ පිරිසක් වනවා.
ඒ අනුව මේවන විට ධාවනය වන දුම්රියන් ධාවනය සිදු වන්නේ ස්ථානාධිපතිවරුන්ගේ කිසිදු මැදිහත් වීමකින් තොරවයි.
දුම්රිය ආරංචි මාර්ග පැවසුවේ විධායක නිලධාරීන්ගේ මැදිහත් වීමෙන් මේ වන විට ධාවනය වන සීමිත දුම්රිය ගමන් සිදු වන බවයි.
නියමිත පරිදි උසස් වීම් ලබානොදීම ඇතුළු කරුණු 14ක් මුල් කරගනිමින් දුම්රිය ස්ථානාධිපති සංගමය මෙම වැඩවර්ජනය ආරම්භ කළේ පෙරේදා පස්වරුවේයි.
මේ අතර, දුම්රිය වර්ජනය ක්‍රියාත්මක වන අවස්ථාවේදී ධාවනය වූ දුම්රියකින් ඇද වැටී ඊයේ පස්වරුවේ බෙම්මුල්ල දුම්රිය ස්ථානය අසලදී පුද්ගලයෙකු ජිවිතක්ෂයට පත් වුණා.
