Sunday, April 6, 2025

General line - 0115112241

නිදහස ගැන ජනපති, අගමැති, විපක්ෂනායක කියූ දේ



සියලු ජනතාව එක්ව ගොඩනැගූ මහජනතාවගේ ආණ්ඩුවක් සමඟ අප මේ වන විට අලුත් මඟකට පිවිස ඇති බව ජනාධිපති අනුර කුමාර දිසානායක මහතා පවසනවා. 

පසුගිය සියවසයේ අපට අහිමි වූ සහ මඟහැරුණු “පොහොසත් රටක් - ලස්සන ජීවිතයක්” යළි ගොඩනගා ගැනීමේ අභියෝගය සමඟ සියලුදෙනා සාමූහිකව පොර බඳමින් සිටින බවයි ජනාධිපතිවරයා පෙන්වා දෙන්නේ. 

77 වන ජාතික නිදහස් දින සැමරුම වෙනුවෙන් ජනාධිපතිවරයා නිකුත් කළ නිදහස් දින පණිවිඩයේ මේ බව සඳහන්. 

පොරොන්දු වූ පරිදිම අද වන විට අප ජාතික පුනරුද යුගයක් වෙත ශ්‍රී ලංකාව කැඳවාගෙන යාමට මේ වන විට සමත්ව ඇති බවයි ජනාධිපතිවරයා පෙන්වා දෙන්නේ. 

ඒ සඳහා එක්වන ලෙසට තමන් ශ්‍රී ලාංකික ජනතාවට ඇරයුම් කරන බවද ජනාධිපතිවරයා නිකුත් කළ නිදහස් දින පණිවිඩයේ වැඩිදුරටත් සඳහන්.

මේ අතර අග්‍රාමාත්‍ය ආචාර්ය හරිනි අමරසූරිය මෙනෙවිය ද නිදහස් දින පණිවිඩයක් නිකුත් කර තිබෙනවා. 

අග්‍රාමාත්‍යවරිය පෙන්වා දෙන්නේ “පොහොත් රටක් - ලස්සන ජීවිතයක්” ගොඩනැගීම වචනයට පමණක් සීමා නොකර ක්‍රියාවෙන් පෙන්වා දියයුතු බවයි. 

ඒ සඳහා ප්‍රජාතන්ත්‍රවාදීව ආර්ථිකය නගා සිටුවීමට මුල්තැන දෙමින් සියලුදෙනාගේම අදහස්වලට සවන් දෙමින් නිවැරදි තීරණ ගැනීමේ භාරදූර කාර්යය කළ යුතුව පවතින බවද ඇය පෙන්වා දෙනවා.

සෑම දෙනාගේම අයිතිවාසිකම් රැකෙන පරිදි සහ වටිනාකමක් දැනෙන ලෙස ජීවත් විය හැකි රටක් ගොඩනගන බවට පොරොන්දු වන බවයි අග්‍රාමාත්‍යවරිය නිකුත් කළ නිදහස් දින පණිවිඩයේ වැඩිදුරටත් දැක්වෙන්නේ.

මේ අතර විපක්ෂ නායක සජිත් ප්‍රේමදාස මහතා ද නිදහස් දින පණිවිඩයක් නිකුත් කර තිබෙනවා.

නිදහසින් පසු අප උරුම කරගත් ප්‍රජාතන්ත්‍රවාදය ශක්තිමත් කරලීම මේ මොහොතේ අප සැමගේ වගකීමක් බවයි ඔහු පෙන්වා දෙන්නේ. 

ඒ සඳහා වර්තමානය නිවැරදි කියවා ගනිමින් වර්ගවාදී, ආගම්වාදී පටු චින්තන පරදවා ඒකරාශී වීමට නිදහස් දිනයේ අධිෂ්ඨාන කරගත යුතු බවද විපක්ෂ නායකවරයා නිකුත් කළ නිදහස් දින පණිවිඩයේ සඳහන්.