කොළඹ 3 මහානාම විද්‍යාලයේ නියෝජ්‍ය විදුහල්පති විසින් ශ්‍රී ලංකා පාසල් ක්‍රිකට් සංගමයේ වැඩබලන සභාපති තිලක් වත්තුහේවා, ලේකම් සහ භාණ්ඩාගාරික ඇතුළු නිලධාරීන්ට එරෙහිව ගොනු කළ පැමිණිල්ලක් නිෂ්ප්‍රභ කර තිබෙනවා
ඒ කොළඹ දිසා අධිකරණ විනිසුරු සඳුන් විතාන මහතා විසින්
පෙබරවාරි 11 වැනි දින මහනුවර ත්‍රිත්ව විද්‍යාලය සහ කොළඹ රාජකීය විද්‍යාලය අතර පැවති වයස අවුරුදු 19න් පහළ පළමු පෙළ පාසල් ක්‍රිකට් තරගාවලියේ අර්ධ අවසන් පූර්ව තරගය පැවැත්වීම වැළැක්වීමේ අතුරු තහනම් නියෝගයක් පැමිණිල්ලෙන් ඉල්ලා තිබුනා
එය ද විනිසුරුවරයා විසින් අවලංගු කර තිබෙනවා
මහානාම විද්‍යාලය වෙනුවෙන් ඉදිරිපත් වූ පැමිණිලිකරු විසින් ත්‍රිත්ව විද්‍යාලයට එරෙහිව ක්‍රීඩා කළ අර්ධ අවසන් පූර්ව තරගය සම්බන්ධයෙන් පැමිණිලි කරමින් මෙම නඩුව ගොනු කෙරුනා
එම තරඟයේ දෙවන දිනයේදී පිටිය සැකසීමට යොදාගන්නා රෝලර් අනිසි ලෙස භාවිත කර ඇති බවත්, ත්‍රිත්ව පිතිකරුවන් පිටියට පැමිණ පසුව තරගය දිගටම කරගෙන යෑම ප්‍රතික්ෂේප කළ බවත් පැමිණිල්ලේ සඳහන්.
කෙසේ වෙතත් ශ්‍රී ලංකා පාසල් ක්‍රිකට් සංගමයේ නිලධාරීන් විසින් තරගයේ ජය ත්‍රිත්ව විද්‍යාලයට ලබා දී තිබෙනවා,.
මහානාම විද්‍යාලය වෙනුවෙන් මෙම නඩුව පවත්වාගෙන යෑමට පැමිණිලිකරුට කිසිදු අයිතියක් නොමැති බැවින්, මෙම ක්‍රියාමාර්ගය වැරදි නීතිමය සහ කරුණුමය පදනමක් මත සිදු කර ඇති බවත්, පැමිණිලිකරුගේ ක්‍රියාමාර්ගය හේතුවෙන් සංගමයට, පාසල් ක්‍රිකට් ක්‍රීඩකයන්ට සහ විනය ක්‍රියා පටිපාටිවලට බරපතළ පාඩුවක් සහ හානියක් සිදුවන බවත් සඳහන් කරමින් ශ්‍රී ලංකා පාසල් ක්‍රිකට් සංගමය අධිකරණයට අයදුම්පතක් ඉදිරිපත් කර තිබුනා.
වයස අවුරුදු 19න් පහළ තරඟාවලියේ අවසන් තරඟ ඉදිරියේදී පැවැත්වීමට නියමිත සාමාන්‍ය පෙළ විභාගවලට පෙර නැවත සැලසුම් කළ යුතු බවත්, පාසල් කිහිපයක් විසින් මහා තරඟ ද පැවැත්වීමට නියමිත බවත් ශ්‍රී ලංකා පාසල් ක්‍රිකට් සංගමය එම අයදුම් පතේ තවදුරටත් සඳහන් කර තිබෙනවා
ත්‍රිත්ව විද්‍යාලයේ නීතිඥවරුන් ද අධිකරණයට දන්වා සිටියේ පැමිණිලිකරු විසින් ඔවුන්ව මෙම ක්‍රියාවට නුසුදුසු ලෙස පාර්ශවකරුවකු කර ඇති බවයි.
නීතිඥවරුන්ගේ දින දෙකක ඉදිරිපත් කිරීම් අසා, කොළඹ දිසා විනිසුරුවරයා අර්ධ අවසන් පූර්ව තරගය පැවැත්වීම වැළැක්වීමේ වාරණ නියෝගය අවලංගු කළ අතර, පැමිණිලිකරුගේ සම්පූර්ණ පැමිණිල්ල නිෂ්ප්‍රභ කළා.
