ඉන්දීය රුපියල සහ මොරිෂස් රුපියල වැනි දේශීය මුදල් වලින් වෙළඳ ගනුදෙනු සිදු කිරීම සඳහා පහසුකම් සැලසීමට ඉන්දීය අග්‍රාමාත්‍ය නරේන්ද්‍ර මෝදි සහ මොරිෂස් රාජ්‍යයේ අග්‍රාමාත්‍ය නවීන්චන්ද්‍ර රාම්ගූලම් එකඟ වී තිබේ.
ඒ, අග්‍රාමාත්‍ය මෝදිගේ මොරිෂස් සංචාරයේදී එළඹි එකඟතා අනුවයි.
ඒ අනුව දෙරට අතර වෙළඳ, ආර්ථික සහයෝගීතාව සහ හවුල්කාරිත්වය තවදුරටත් ශක්තිමත් කිරීම සඳහා විස්තීර්ණ ආර්ථික සහයෝගීතා සහ හවුල්කාරිත්ව ගිවිසුම (CECPA) යටතේ ඉහළ බල ඒකාබද්ධ වෙළඳ කමිටුවේ දෙවන සැසිවාරය පැවැත්වීමට ද නායකයින් දෙදෙනා එකඟ වූහ.
මාර්තු 11-12 දක්වා පැවැති අග්‍රාමාත්‍ය නරේන්ද්‍ර මෝදිගේ මොරිෂස් රාජ්‍ය සංචාරයේදී නවීන්චන්ද්‍ර රාම්ගූලම් සහ අගමැති මෝදි ද්විපාර්ශ්වික සබඳතාවල සමස්ත පරාසය පිළිබඳව පුළුල් සහ ඵලදායී සාකච්ඡා පැවැත්වූ බව ඉන්දීය මාධ්‍ය වාර්තා කරයි.
මාර්තු 11 වන දින පැවති රැස්වීමේදී, මුරුසිය සහ ඉන්දියාව අතර අසමසම විශේෂ සහ අද්විතීය සම්බන්ධතාවයක් ඇති බව නායකයින් දෙදෙනා නැවත තහවුරු කළ අතර එමගින් ඉතිහාසය, භාෂාව, සංස්කෘතිය, උරුමය, ඥාතිත්වය සහ වටිනාකම් පිළිබඳ බෙදාගත් බැඳීම් සැලකිල්ලට ගෙන ඇත.
ඉන්දීය අග්‍රාමාත්‍ය කාර්යාලය විසින් නිකුත් කරන ලද වැඩිදියුණු කළ උපායමාර්ගික හවුල්කාරිත්වයක් සඳහා වූ ඉන්දියා-මොරිෂස් ඒකාබද්ධ දැක්ම' ප්‍රකාශ කළේ දෙරට අතර වෙළඳ හා වාණිජ සම්බන්ධතා විවිධාංගීකරණය කිරීමට ඔවුන්ගේ ස්ථිර කැපවීම නැවත අවධාරණය කර ඇති බවයි.
දෙරට අතර වෙළඳාම, ආර්ථික සහයෝගීතාව සහ හවුල්කාරිත්වය තවදුරටත් ශක්තිමත් කිරීම සඳහා ද නායකයින් දෙපළ එකඟ වී ඇතයි සඳහන්.
