2008 වසරේ සිට 2024 වසර දක්වා කාලය තුළ ජනාධිපති අරමුදලින් මුදල් ලබා ගැනීමට අදාළව, හිටපු අමාත්‍යවරුන් හා පාර්ලිමේන්තු මන්ත්‍රීවරුන් විසි දෙදෙනෙකු සම්බන්ධයෙන් අපරාධ පරීක්ෂණ දෙපාර්තමේන්තුවේ මූල්‍ය හා වාණිජ අපරාධ විමර්ශන අංශය මගින් විමර්ශන ආරම්භ කර තිබෙනවා.
ජනාධිපති අරමුදලින් මෙම මුදල් ලබා ගැනීමට අදාළව පවත්වාගෙන ගිය ගොනු 22ක් විමර්ශන නිලධාරින් භාරයට ගෙන ඇති බවයි පොලීසිය පවසන්නේ.
එම ගොනුවලට අදාළව හිටපු අමාත්‍යවරුන් හා පාර්ලිමේන්තු මන්ත්‍රීවරුන් විසිදෙදෙනා විසින් විවිධ මුදල් ප්‍රමාණයන් වශයෙන් රුපියල් කෝටි 10කට අධික මුදලක් ලබා ගෙන ඇති බවට අනාවරණය වී ඇති බවයි පොලීසිය නිවේදනයක් නිකුත් කරමින් සඳහන් කළේ.
ඒ අනුව සිදු කරගෙන යන විමර්ශනවලට අදාළව ජනාධිපති අරමුදලෙන් නිකුත් කරන ලද චෙක්පත් පිළිබඳ විස්තර ලබා ගැනීමට කොළඹ කොටුව මහේස්ත්‍රාත් අධිකරණයෙන් නියෝගයක් ලබා ගැනීමට පියවර ගෙන ඇති බව පොලීසිය වැඩිදුරටත් සඳහන් කළා.
